Mandaue driver mikisikisi sa ordinansa

CEBU, Philippines - Nanawagan ang presidente sa Kahugpungan sa Mandaue Jeepney Operators and Drivers Association (KAMJODA) nga si Loreto Gerez ngadto kang Mayor Michael Rama nga ikonsiderar unta ang ilang panginabuhian.

Sumala pa ni Gerez nga maapektohan pag-ayo ang panginabuhian sa mga drayber gumikan sa hingpit karong pagpatuman sa City Ordinance 1837 nga nagdili sa pag-agi sa mga jeepneys nga nagbiyahean sa rota sa Mandaue nga moagi sa Siyudad sa Sugbo.

“Dili man gud lalim ang nahitabo karon, luoy na intawon kaayo ang mga drayber kay minos na lang kaayo ang ilang ginansiya,ang uban maglisod na og bayad sa abangan sa ilang unit,” matud pa ni Gerez.

Dugang pa niya nga duna na’y mga drayber karon ang nangundang na sa ilang pagbiyahe gumikan kay wala na kaantos sa kalisod.

Matud pa niya nga sa wala pa hingpit nga gipatuman ang ordinansa sa siyudad, makaginansiya ang mga drayber og kapin sa P500 apan karon moabot na lang kini og P200.

“Kasagaran baya sa atong mga drayber karon kay dunay gibuhi nga pamilya. Kuwang ra intawon kaayo ang ginansiya para isustento sa ilang pamilya. Ang ubang anak sa mga drayber kay nangundang lang intawon sa ilang pag-eskwela kay wala naman sila’y balon,” sumala pa ni Gerez.

Kahinumduman nga unang gidid-ang makasulod sa downtown Cebu City area ang 21B ug 22B routes nga moagi sa Jones Avenue. Niining higayona giapil na usab nga dakopon ang mga jeepneys nga mosulod sa Urdaneta St. dapit sa Metropolitan Cathedral.

Apan si Mayor Michael Rama misaysay nga walay dautan nga gibuhat ang siyudad gumikan kay igo ra kini miimplementar sa ordinansa.

Subling giklaro sa mayor dili kini panimalos ngadto sa mga opisyales sa dakbayan sa Mandaue kinsa nagdili na usab sa mga garbage trucks sa siyudad sa Sugbo nga makaagi sa ilang lugar kun molabay og basura ngadto sa Consolacion. (BANAT NEWS)