Mipatay alang sa gugma

CEBU, Philippines - Gumikan sa nag-uros-uros nga gugma sa usa ka lalaki ngadto sa usa ka ginang nga mibuwag na kaniya gidagit ug gipatay sa lalaki ang 7-anyos nga anak nga lalaki sa ginang ug pagkahuman gisuwayan pagtago ang krimen pinaagi sa paglubong niini sa ilang kasilyas diha sa sitio Riverside B sa barangay Subangdaku sa dakbayan sa Mandaue.

Nadiskubrehan ang biktima human mangalisbo ang baho niini ug gidugokan og daghang langaw ug lagong hinungdan sa pagsumbong nila sa kapolisan nga miresulta sa pagkaugkat sa patay’ng lawas ni Gabriel Morales.

Si Gabriel Morales, 7, tinun-an sa grade 2 sa Opao Elementary School kinamanghurang anak sa tulo ka managsuon kansang ilang amahan natanggong sa Mandaue City Jail tungod sa kaso sa ilegal nga drugas.

Anaa na hinuon sa kostudiya sa kapolisan ang suspek nga si Mario Abesia, 42, nga kanhi kapuyo sa inahan sa biktima ug si Arsenio Ursal Jr., 32, taga Subangdako nga giingong kakunsabo niini paghimo sa krimen.

Tungod sa kabaho, girumbo sa mga silingan ug mga tanod ang pansayan sa balay sa suspek nga diin nagtapok ang lagong ug dihang ilang gibubuan og tubig adunay dugo nga migawas sa tubo paingon ngadto sa kilid sa sapa hinungdan nga nanawag dayon sila og pulis.

Ang biktima dihang giugkat giputos kini og habol ug gibaatan og masking tape lakip na ang ulo niini dayon gitabonan og yuta ang gilubngan nga may sagol nga dinugmok nga hollow blocks.

Apan sa wala pa mapalgi ang biktima nasikop nang daan sa kapulisan niadtong Domingo ang suspek atol sa entrapment operation sulod sa Hidden Lodge sa barangay Guizo sa mga sakop sa Opao Police Station nga gipangulohan ni Insp. Wilson Abot human ang inahan sa biktima mireklamong gidagit niini ang iyang anak.

Matud ni Abot gustong makig-sex ang suspek sa inahan sa biktima niadtong Domingo hinungdan nga iyahang gimanduan ang inahan nga si Christine Morales nga tanduon kini aron ilang dakpon.

Niadtong Sabado gikatahong gikuha ni Abesia ug Ursal sa balay ni Morales ang biktima human mapakyas nga mahilot nilang duha ang ilang panagbangi nga nagsugod sa pangabubho sa suspek nga basin adunay laing lalaki si Christine.

Nianang pagka alas-11 sa Sabado sa gabii nakadawat og text message si Christine gikan kang Abesia nga nagpahibalong iyang gipatay ang anak niini.

Wala dayon motuo si Christine kay basin nangomedya ra kaniya si Abesia hangtud nga mitawag kini kaniya ug dihang iyang gihangyo padunggon sa tingog sa anak wala kini mosugot. Tungod niini midangop siya sa kapulisan.

Apan si Abesia mihimakak nga siya maoy mipatay sa bata kay iyaha kining pinangga ug iyaha ra kining gidala sa Fuente Osmeña ug gipakaon nianang Sabado sa gabii ug pagkahuman nanguli sila sa iyang balay sa Subangdako.

Gidugang ni Abesia nga iyahang gitugyan ang biktima kang Ursal ug wala na siya makahibawo sa gibuhat niini.

Si Sr. Supt. Noel Gillamac, director sa Mandaue City Police Office (MCPO) nagkanayon nga usa ka crime of passion ang gihimo sa suspetsado.

Matud ni Gillamac nga nagtuo siyang giplano nang daan sa duha ang pagpatay sa biktima ug si Abesia maoy utok sa pagpatay samtang si Ursal principal by direct participation.

Human mapalgi ang biktima kagahapon, daling gidakop sa kapulisan si Ursal sa ilang panimalay kinsa hugtanon sad nga mihimakak og kalambigitan sa maong kremin.

Si Sr. Insp. Meche Gabod sa Womens and Childrens Protection Desk sa MCPO nga nahinabi sa Banat News nagkanayon nga nanguha pa sila og affidavits sa mga saksi.

Subay sa resulta sa eksaminasyon sa doktor nga na-suffocate (nahutdan) og hangin ang bata maong namatay. (BANAT NEWS)