Polis mireklamong gikulata sa kaubang polis

CEBU, Philippines - Hugtanong gipanghimakak sa kontrobersyal nga pulis nga kanhi nadestino sa Naga Police Station nga nagwara-wara siya sa iyang armas tungod sa kahubog niadtong Sabado sa gabii diha sa Plaza luyo nga bahin sa munisipyo atol sa LGU’s Night nga tipik ug kabahin sa kalihokan sa nagsingabot nga kapistahan sa maong siyudad karung Oktobre 10. Apan si Chief Supt. Marcelo Garbo Jr. ang director sa Police Regional Office-7 mimando kang Sr. Supt. Patrocinio Comendador, hepe sa kapulisan sa probinsya nga imbestigahon ang hitabo.

Si Bolaño nga nahinabi sa Banat News sulod sa detention cell sa Naga Police Station nagkanayon nga daw gibinaboy siya sa mga pulis niadtong higayona sa dihang gidala siya sa presinto.

Mipasangil siyang giposasan ug gitabangan siya og kulata hangtud nga siya nakuyapan dungan sa pagpakita sa iyang mga bun -og sa bukobuko ug ang tudlo sa tuo niyang kamot nga hapit maputol iyang gipasangil nga giduslak og tumoy sa puan sa armas sa hepe nga si Chief Insp. Timar Alam samtang nagkupot siya sa rehas sa sulod sa detention cell.

Siya misaysay nga tipon siya sa lamesa ni Mayor Valdimar Chiong, si Alam ug uban sa mga opisyales sa barangay.

Gani matud pa niya nga nagpaila pa siya kang Alam nga siya si PO3 Bolaño apan nahibulong nalang siya nga gipadad-an na siya og mga pulis diha sa lamesa ug gidala sa police station.

“Kun nakasala ko dili ko nila bun-ogon og maayo nila, mora ko’g baboy, nakainom tuod ko pero dili ko salbahis nga pagkatawo, gitionan pa ko sa armas ni Alam iyang gipitik pero wa nibuto mao to giduslak man siguro sa tumoy sa iyang armas ning akong tudlo kay naghupot man ko sa rehas,” matud pa niya.

Iya usab gihimakak nga may kasuko siya dihang girelibohan siya sa Naga niadtong mga nangaging mga buwan. Si Bolaño pito ka tuig na nga nadestino sa maong siyudad.

Si Bolaño gibalhin sa Consolacion Police Station human kini gipasanginlan sa usa ka reklamante sa pagpanglugos nga kuno nasakpang nakighawok sa usa ka policewoman sulod sa Women’s and Children’s Protection Desk.

Gani ang maong policewoman girelibohan usab ug gibalhin sa laing lungsod apan nasayran sa Banat News nahibalik na kini sa Naga.

Atol sa hitabo niadtong Sabado usa ka pulis nga si PO1 Junarie Latorre nabun-og ang agtang human naigo sa posas sa pagkisikisi ni Bolaño.

Si C/Insp. Timar Alam, hepe sa Naga City Police dihang nahinabi sa Banat News miingon nga di niya pasayluon ug pasakaan gyud og kaso si Bolaño tungod sa gihimong pagpakauwaw niini ngadto niya nga nanion sa armas ug pagpanghadlok sa mga tawo.

Matud ni Alam kasong grave threats, direct assault, alarm and scandal ug grave misconduct ang iyang gi-andam nga mga kaso.

Si Mayor Chiong sa iyang bahin nagkanayon nga iya nalang itugyan ngadto sa kapulisan ang pagpahigayon og imbestigasyon kun unsay tinuod nga nahitabo.

Giangkon sa mayor nga nasuod na sa ilang grupo si Bolaño kay bisan tuod og dili kini taga Naga mag-anhaan kini sa Naga aron makigduwa nila og tennis.

Matud niya nga sa wala pa mahitabo, iyang gipatawag si Bolaño ug iyaha pang gitambagan nga mokalma. Kini miklarong di siya manghilabot sa imbestigasyon apan kinahanglang ipaagi sa due process.

Samtang si Comendador miklarong mabun-og gyud ang tawong dinakpan kung magmagahi sa pag-aresto ug base sa impormasyong iyang nakuha ‘nagwala’ ug midagan si Bolaño niadtong hitaboa.

Apan iyang gidugang nga mahimong mopasaka og kaso si Bolaño batok ni Alam tungod sa pagduslak niini og armas sa iyang tudlo. (BANATNEWS)