CCMC magdugang og kawani

CEBU, Philippines - Bisan pa man sa kakuwang sa pasilidad ug luyo sa mga grabeng pagsaway nganha kanila gipangangkon sa mga nagdumala sa Cebu City Medical Center nga milambo gihapon ang ilang serbisyo ngadto sa katawhan.

Kini maoy gibutyag sa officer-in-charge sa CCMC nga si Dr. Gloria Duterte kinsa nahinabi sa mga tigbalita kagahapon atol sa selebrasyon sa ika-50 ka tuig nga anibersaryo sa maong tambalanan.

Ang head sa Personnel Services sa CCMC nga si Rey Cris Panugaling mipahibalong mas mapalapdan pa nila ang ilang maserbisyohan gumikan sa dugang kawani nga ilang kuhaon.

Ang CCMC kasamtangang adunay 400 ka mga empleyado gikan sa mga doktor, nurses hangtud na sa mga support personnel gikan sa nagkadaiyang departamento.

Nagtinguha ang CCMC nga mokuha og dugang 144 ka mga bag-ong kawani.

Ang siyudad migahin og P211 milyones nga budget karong tuiga alang sa CCMC ug aduna pay hangyo ang CCMC sa siyudad nga himuon kining P500 milyones sunod tuig aron mapalit ang ubang ekipo nga ilang gikinahanglan.

Si Mayor Michael Rama nagkanayon nga uyon siya padak-an ang budget sa maong tambalanan gumikan kay gitagaan og pagtagad sa iyang administrasyon ang panglawas sa tawo.

Gitataw hinuon sa mayor nga mangayo siya og listahan sa mga plano ug mga nagkadaiyang programa sa CCMC aron madepensahan ang gi-propose nga budget sunod tuig.

Ang CCMC midugang og 48 ka mga nurses karong tuiga aron mapalapdan pa og maayo ang ilang serbisyo.(Sanden J. Anadia/EIM) (BANAT)