CEBU, Philippines - Naglambigit sa panag-atbang sa fraternity ang mga nahitabo nga pagpamusil sa barangay Bankal sa dakbayan sa Lapulapu nga mipatay ug miangol sa mga biktima niini.
Si Chief Inspector Conrado Manatad, hepe sa kapolisan sa Presinto 5 dihang nahinabi sa Banat News niadtong miaging adlaw mibutyag nga duha na ang namatay ug usa ang naangol sa maong krimen.
Si Manatad mibutyag nga nadakpan na nila ang pipila sa mga suspetsado sa maong mga pagpamusil ug diha nila madiskubrehing panagribal sa duha ka grupo sa mga batan-on ang motibo niini.
Ang kapolisan mipalapad pa sa ilang pagpatrolya sa adlaw ug gabii sa Presinto 5 ug kuyog niini ang mga barangay tanod sa matag barangay nga gilangkoban sa barangay Pajo, barangay Ibo, barangay Buaya ug barangay Bankal. Sa nasayran sa Banat News nga niadatong Huwebes sa gabii usa ka Alimar Madrigal ang napusilan samtang kini naglakaw kuyog ang asawa niini sa usa ka lalaking luwan og motorsiklo.
Gisundan pa og laing hitabo sa pagpamusil sa miaging Domingo sa kaadlawon nga ang biktima nga si Luis Bryan Mongmongan, 21, namatay tungod sa mga samad pinusilan sa iyang kalawasan. (Romeo T. Limpangog/EIM) (BANAT)