Pansoy gipasakaan na'g kaso

CEBU, Philippines - Napasaka na sa korte ang kasong Robbery with Homicide batok ni Bryant Pansoy Jr. isip kakunsabo sa krimen, kini human makita ni city prosecutor Napoleon Alburo nga angayan gayud nga pasakaan og kaso.

Sa gipagawas nga amended information napamatud-an nga si Oliver Cabarse, mao gayuy nagpatay sa iyang inahan nga nagsabak og walo ka buwan ug sa 5 anyos nga step sister niini. Samtang si Pansoy napamatud-an usab nga nasayod sa maong krimen ug gani siya pa ang mihatag sa armas nga gigamit ni Cabarse sa pagpanunggab sa iyang inahan ug igsuon.

“The undersigned finds enough and sufficient evidence to indict respondent Bryant Labang Pansoy, Jr., as an accomplice of the Robbery with Homicide filed against accused Oliver Cabarse” tipik sa inquest resolution.

Si Pansoy girekomendar nga makapiyansa og P200 mil bugti sa iyang kasamtangang kagawasan, samtang si Cabarse sa iyang bahin gihukmang   mapriso usab sa iyang tibook kinabuhi.

Kahinumdoman nga niadtong buwan sa Septembre 9, 2011 sa alas 6:00 sa buntag , nautingkay ang silingan ni Virgendina Bantilan sa barangay Naalad syudad sa Naga dihang   napalgan ang biktima ug ang  iyang 5 anyos nga anak nga nagbuy-od   sa ilang sawog nga naglunang sa ilang dugo nga pulos na patay.

Sa pakisusi sa kapolisan, nasayran nga ang anak niini sa pagkadalaga nga si Cabarse maoy miunay pagpatay kanila pinaagi sa kutsilyo nga maoy gipanunggab. Gani sa wala pa niya dunggaba ang iyang inahan ug manghod   gipusposan pa kini ni Cabarse sa pul-an sa kalibre .38 nga giingong gipanag-iya ni Pansoy. (Lesley Caminade-Vestil/WC)  (BANAT)