Mipusil sa kaubang polis suspensohon

CEBU, Philippines - Ang duha ka opisyal sa Airport Police Department (APD) nga miunay og pusil   sa ilang kauban posibleng ipaubos sa “preventive suspension” samtang   atubangon usab nila ang kasong frustrated homicide nga gipasaka na sa biktima kagahapon sa hapon.

 Kini ang giluwatang pamahayag ni APD OIC Chief, Maj. Bonifacio Pusta sa pakighinabi sa Banat News kagahapon kinsa nagkanayon nga  may imbistigasyon usab silang gihimo alang sa kasong administratiba nga atubangon   nila ni Capt. Clarito Alvarez ug Lt. Pio Alvarez. Ang duha maoy nagtinabangay pagpusil kang Cpl. Esmeraldo Bensi sulod sa ilang buhatan niadtong kagabhion sa Septembre 29, 2011.

Matud pa ni Pusta nga samtang magpadayon ang imbistigasyon sa kaso, suspensohon usab sa trabaho ang mga suspetsado.

Hinuon ang kasong frustrated homicide nasang-at na ngadto sa buhatan sa piskaliya sa dakbayan sa Lapulapu kagahapon sa hapon.

Midugang usab si Pusta nga gipaabot pa nila ang resulta sa liquor test kang Bensi gikan sa tambalanan aron matino kun tinuod bang hubog kini sa ilimnong makahubog dihang miuna kini sa pagpusil sa duha ka suspetsado. Sutaon usab nila ni Pusta kun   ang duha ka suspek wala ba usab makainom og ilimnong makahubog dihang gitabangan og pusil niini si Bensi.

Matud pa ni Pusta nga kung tinuod man gani ang alegasyon nga naggumikan sa   kaubos nga grado sa performance evaluation ang hinungdan sa pagpanghasi ni Cpl. Bensi ngadto sa iyang mga opisyal , kini usa ka taphaw nga katarungan lamang.

Si Bensi   luwas na sa peligro ug nagpaalim nalang kini sa iyang samad sa bukobuko, liog ug tiyan sa   sulod sa Mactan Doctors’ Hospital samtang ang mga suspetsado nagtingkagol na karon sa prisohan sa kapolisan sa dakbayan sa Lapulapu.

Kahinumdoman nga sa alas 9:30 sa kagabhion niadtong Septembre 29 nagkagubot ang opisina nila ni Alvarez dihang mihiwasa kuno sa Bensi kay nasuko kini nga ubos kaayo ang naangkong grado niini sa performance evaluation nga gihimo    sa mga suspek nga   iyang mga labaw nga opisyal

Unya gumikan kay giingong hubog milanit kuno kini sa iyang armas de fuego ug gipamusil ang duha ka suspek.

Apan gumikan sa kaabtik sa duha,   dali kaayo kining nakapasok ilawom sa ilang lamesa ug dihang mihulbot sila sa iIang armas gitabangan nila og pusil si Bensi hinungdan nga nasabak kini sa mga bala sa nagkalainlaing bahin sa lawas. (WC) (BANAT)