Pagdili sa garbage truck giisip nga bawos

CEBU, Philippines - Gihangop sa mga drayber sa 21B nga PUJ sa dakbayan sa Mandaue ug mga pasahero ang pagdili na sa mga trak sa basura sa kagamhanan sa dakbayan sa Sugbo nga dili tugotan sa kagamhanan sa dakbayan sa Mandaue sa pag-agi sa kadalanan niini.

Bisan paman ang dakbayan sa Mandaue una nang miklarong dili kini usa ka panimalos sa gihimo sa dakbayan sa Sugbu sa mga 21B nga jeepneys apan ang mga drayber sa 21B miisip niini nga bawos. Si Amado Munez, 50, taga Guadalupe sa dakbayan sa Sugbo ug drayber sa PUJ nga 21B nga nahinabi sa Banat News miingon nga maayong lakang ang gihimo sa kagamhanan sa dakbayan sa Mandaue isip tugbang sa gihimo sa kagamhanan sa dakbayan sa Sugbo nga dili na pagpaagi kanila diha sa Jones Avenue.

Matud pa niya nga dako kaayong epekto sa ilang pagpamasahero ang pagdili sa pagpasulod sa kinapusorang bahin sa dakbayan sa Sugbo sa gimaneho nilang PUJ sanglit may mga higayon man magbalikbalik sila sa Mandaue ug Ayala nga walay sakay nga pasahero.

Si Armando Lapa, 37, nga taga Guadalupe sa dakbayan sa Sugbo ug nagtrabaho sa Mactan Export Processing Zone (MEPZ) 2 nga nahinabi sa Banat News mipadayag maayo ang gibuhat sa Mandaue agi og tugbang sa gihimo sa Cebu City sa 21B nga maoy ilang sagad sakyan padulong sa trabaho.

Matud pa niya tungod sa pagdili sa Cebu City sa pagpasulod sa 21B nahasol ug nagduble-doble na hinuon ang ilang gastos sa pletihan.

Ang siyudad sa Mandaue pinaagi ni Konsehal Benjamin Basiga daan nang miklarong igo ra nilang gipatuman ang Environmental Laws.  - BANAT NEWS