Drive-by shooting sa Lapu' usa patay

CEBU, Philippines - Patay ang usa ka batan-ong lalaki nga biktima sa pagpamusil sa tulo ka wala mailhing lalaki nga nagsakay og motorsiklo alas-3 pasado ang takna sa miaging kaadlawon sa sitio Mahayahay, barangay Bankal, dakbayan sa Lapulapu.

Ang namatay mao si Luis Bryan Mongmongan, 21, taga barangay Mactan sa maong dakbayan ug ang nagpusil mao ang duha ka back rider sa motorsiklo nga nagdala og armas nga kalibre .45 ug .9mm nga pistola.

Si PO2 Winston Ernie sa homicide section sa kapolisan sa dakbayan sa Lapulapu nga nahinabi sa Banat News miingon nga nakig-inom ang biktima uban sa iyang mga barkada sa sulod sa panimalay ni Roly Banzon nga nahimutang sa sitio Mahayahay sa barangay Bankal sa maong dakbayan.

Samtang nagpadayon ilang panag-inom kalit milabay ang motorsiklong may sakay nga tulo ka batan-ong lalaki ug ang duha ka mga angkas kalit mirakrak sa panimalay ni Banzon.

Ang biktima nga naglingkod duol sa bintana naigo sa dughan ug uban pang bahin sa iyang kalawasan.

Human sa maong pagpamusil ang tulo ka mga lalaki mipabulhot kini sa pagpadagan pahilayo paingon sa barangay Maribago ug wala na igkita sa kapolisan.

Gidala ang biktima sa Mactan Doctors Hospital sa dakbayan sa Lapulapu sa iyang mga barkada apan gideklarar kini sa mga doktor nga dead on arrival ang biktima.

Si Ernie miingon nga nagpadayon karon ang ilang gihimo nga imbestigasyon sa pagsuta kun ang maong pagpangrakrak nga nahitabo sa miaging gabii may kalambigitan ba usab sa mga nangaging pagpamusil sa maong lugar nga mikalas usab og kinabuhi.

Nakuha diha sa crime scene ang tulo ka mga kabhang sa kalibre .45 ug kabhang usab sa kalibre .9mm nga bala nga gituohan gikan sa mga armas sa mga mamumuno.  - BANAT NEWS