CEBU, Philippines - Usa ka polis nga sakop sa Mobile Patrol Group sa Mandaue City Police Office (MCPO) gipasanginlang nangulata sa iyang silingan niadtong Huwebes sa buntag diha sa Purok Villa Manga, barangay Opao, dakbayan sa Mandaue.
Si Senior Superintendent Noel Gillamac, director sa MCPO mimando sa Investigation and Detective Management Branch (IDMB) ug sa kapolisan sa Station 5 nga mopahigayon og imbestigasyon sa maong insidente.
Ang polis nga gipasanginlang nangulata kang Wilburt Pañares, 24-anyos mao si PO1 Rex Arnosa, 26 nga giingong nahitabo niadtong Huwebes sa alas 6:30 sa buntag dihang ang biktima paingon untang maligo diha sa gripo gawas sa ilang balay.
Apan si Arnosa mipasangil usab ngadto kang Pañares nga maoy nanguna og sumbag sa iyang nawong.
Sa maong engkwentro ang duha parehong nakaangkon og mga bun-og sa ilang lawas ug pareho usab kining mi-report diha sa Station 5.
Si Arnosa sa iyang bahin, nangangkon nga sa wala pa mahitabo ang insidente nagbarog siya diha dapit sa gate sa ilang balay dihang si Pañares miduol kaniya ug gisita siya niini nga nagkanayon “nganong nagtulis-tulisok ka man sa akong asawa?” nga maoy hinungdan sa ilang away.
Apan si Pañares usab nangangkon nga paingon na unta siya ngadto sa gripo dihang si Arnosa miali sa iyang agianan ug gisukmag siya niini human niini gitionan siya niini og armas hinungdan nga mikaratil siya og dagan sa ilang balay.
Si Gillamac nagkanayon nga nagkinahanglang ang duha makakuha og mga witness sa paglig-on sa ilang mga pasangil sa usag-usa.
Ang napamatud-an nga sad-an sa hitabo mag-atubang kini og tukmang kaso. - BANAT NEWS