CEBU, Philippines - Gipadayag sa division chief sa Mines and Geosciences Bureau sa Department of Environment and Natural Resources-7 nga si Al Emil Berador nga magpabilin gihapon nga bahaon ang pipila ka dapit sa Siyudad sa Sugbo panahon sa kusog nga uwan gumikan sa nagkamabaw na nga mga sapa ug mga kanal karon.
Si Berador nagkanayon nga walay laing solusyon niining tanan gawas sa pagpalapad sa mga kanal o kaha pagpanaod og mga higanteng imbornal.
Matud pa ni Berador nga kun dili kini buhaton sa kagamhanan sa dakbayan walay mahitabong kasulbaran niining lunop nga masugamakan sa mga patag nga lugar ning siyudad sa panahong mobundak ang kusog nga uwan.
Ang kanunay lunopan mao ang downtown area ug sa pipila ka dapit sa Banilad ug Talamban kansang mga kanal sirado na sa hugaw ug lapok sama usab sa mga sapa sa maong mga dapit nga halos pulos na lapok ang sulod busa inig bundak sa kusog nga uwan dali kaayong muawas ang tubig sa sapa.
Unya adto kini mopundo sa mga karsada kansang imbornal mga karaan na nga gipanglubong kaniadto sa nahaunang administrasyon nga dagko lang og dyutay sa paa sa tawo.
Matud pa ni Berador nga gawas sa gobyerno, kinahanglan usab nga mohatag og kooperasyon ang katawhan pinaagi sa paglikay sa pagpataka og labay sa basura sa mga kanal ug sa sapa sanglit mao kini ang makapabara sa tubig nga maoy hinungdan sa pagbaha ug lunop sa nagkalainlaing dapit ning dakbayan.
“Kung nagkadaghan ang balay, magkagamay pud ang agianan sa tubig. Busa mao na ang angayan tun-an pag-ayo aron matagaan na siya og solusyon ug usa na niana ang lapad nga drainage system,” matud pa ni Berador.
Una na nga gipahibalo sa MGB-7 nga kinahanglan nga alerto ug mabinantayon kanunay ang katawhan sa panahon sa ting-uwan ilabi na kadtong namuyo dapit sapa ug sa baybayon.
Mipadayag na usab si Mayor Michael Rama nga nakaalerto karon ang Quick and Response Team sa dakbayan nga maoy moresponde sa nagkadaiyang alarma.
Giawhag sa mayor ang publiko nga kung mabantayan niini nga magpaingon na ang lunop sa tubig sa ilang palibot kinahanglang mobakwit na sila sa luwas nga lugar aron kalikayan ang disgrasya. - BANAT NEWS