Mireklamo sa polis maoy gipriso

CEBU, Philippines - Gidakop ug mao hinuoy nabalhog sa bilanggoan ang usa ka 52-anyos nga lalaking nagpaabang og apartment human masakping nagdala og pistola sulod sa police station sa dakbayan sa Danao dihang kini misumbong aron ipadakop ang iyang mga boarders nga nanuyop og shabu.

Ang nagtingkagol na karun sa karsel human gipasakaan og kaso mao si Edgar Delos Santos Mercado, 52, molupyo sa Beatriz Village, barangay Poblacion, Danao.

Usa ka kalibre .45 pistola ug usa ka magazine nga dunay sulod nga pito ka buhing bala ang nakuha gikan kaniya.

Matud ni PO1 Faron Avila, desk officer sa Danao City Police dihang nahinabi sa Banat News subay sa imbestigasyon buot untang magpatabang sa mga polis aron ipasikop ang iyang mga boarders nga nanuyop.

Apan samtang nag-report siya sa kapulisan migawal ang puloan sa maong pistola diha sa iyang lawas hinungdan nga gisitar kini sa mga polis ug dihang gipangitaan og lisensiya wala kini napakita.

Nunot niini nauna na hinuon siya og katanggong sa karsel imbes nga ang mga nanuyop niyang boarders tungod sa kasong illegal possession of firearms.

Hinuon giadto sa mga polis ang gireklamo ni Mercado apan pag-abot sa paabangang balay niini walay nasakpang nanuyop nga boarders ang mga polis. (BANATNEWS)