Manakopay og manigarilyo manakop na

CEBU, Philippines - Pormal nang gilusad kagahapon sa kagamhanan sa Siyudad sa Sugbo ang Anti-Smoking campaign nga tabangan sa Task Force Cancer.

Aduna na unyay mga sakop sa City Hall nga ipakatap sa kadalanan aron sigurohong masakpan gyud ang magpataka og pabulhot og aso diha sa pangpublikong lugar.

Ang kampanya gibuksan kagahapon diha sa Plaza sa Sugbo kung diin subli nga mipahimangno si Mayor Michael Rama nga dili magpataka og sigarilyo sa bisan asa nga pampublikong dapit.

Matud pa niya nga dili lang ang mismong nanigarilyo maoy maapektahan sa aso sanglit hasta ang mga tawong wala manigarilyo   makahanggab sa aso.

Base sa pagtuon, ang aso nga gibugwak sa mga manigarilyo (second hand smoke) mas grabe og epekto nga mahatag ngadto sa mga tawong dili manigarilyo ug makahanggab niini. Sila maoy numero unong mataptan og sakit nga kanser.

Kahinumduman nga gi-aprobahan sa city council sa miaging adlaw ang pag-umento sa violation fee alang sa mga masakpang manigarilyo sa pampublikong sakyanan ug lugar.

Ang masakpan makabayad og P4,000 ngadto sa P5,000 ug mosaka pa base sa gidaghanon sa kalapasang nahimo. Kaniadto usa ka libo ra ang multa niini.

Duna say silot nga usa ka tuig nga pagkabilanggo alang niadtong nakalapas.

Ang karaang ordinansa nagsugod pa sa panahon ni kanhi mayor Ronald Duterte niadtong 1978 busa gimando na ni Rama sa estriktuhon kini sa pagpatuman.

Ang pagpanigarilyo gidili sa mga bus stations, mga opisina sa gobiyerno, eskwelahan, tambalanan, clinic, gasolinahan, simbahan ug uban pa nga pampublikong lugar nga kasagaran dagsaan sa mga tawo.(EIM) (BANATNEWS)