Tulo nasikop naghupot og druga

CEBU, Philippines - Nadakpan sa kapolisan ang tulo ka tawo nga suspetsado nga tigpayuhot og ginadiling drugas sa dakbayan sa Mandaue sa miaging Biyernes.

Ang maong mga suspek giila sa mga polis nga sila si Rodrigo Gesulga, 19, ulitawo nga taga sitio Sab-an sa barangay Basak, Amador Balaga, 31 nga taga barangay Casuntingan, ug Alexander Omolon, hingkod nga taga barangay Umapad, tanan sa dakbayan sa Mandaue.

Matud pa ni SPO3 Renato Valle nga si Gesulga nasakmitan og usa ka dinagkotan na nga linikit nga marijuana, samtang si Balaga usa ka paketeng shabu , ug si Omolon nasikop pinaagi sa warrant of arrest sa kaso gihapong may labot sa gidiling drugas.

Ang tulo ka mga dinakpan gipasakaan na og kaso gumikan sa paglapas sa   Republic Act 9165 kon Comprehensive Dangerous Drug Act of 2002 ug pulos na karon nagkagulkol sa prisohan sa kapolisan sa maong dakbayan. (BANATNEWS)