CEBU, Philippines - Nagsugod na sa pagpamutos og mga school supply ang mga kawani sa Kapitolyo alang sa mga nanagtunghang kabataan sa kalungsoran ning lalawigan sa Sugbo.
Kini maoy tahas nga gituman sa mga miyembro sa Provincial Employees Association of Cebu (PEACE) agi og tabang sa programa ni Governor Gwendolyn Garcia sa pagpanghatag og mga school supply ngadto sa mga kabataan nga nagtungha sa nagkadaiyang mga publikong tulunghaan sa kalungsoran.
Ang presidente sa PEACE nga si Ma. Junelene Arenas miingon nga mokabat na sa kapin 84 mil ka mga set sa school supply ang na-impake sa mga kawani.
Sigun pa ni Arenas nga ang matag departamento sa Kapitolyo giawhag sa paggahin og 2 ka oras matag adlaw sa pagtabang og pamutos sa mga supply sa tulunghaan.
Midugang siya nga pinaagi sa ilang tabang, ang kagamhanan sa lalawigan sa Sugbo naggahin og salapi aron isuhol sa gi-hire nga dugang mga kawani aron lamang moputos sa maong mga kasangkapan.
Daan nang programa sa gobernador ang pagpanghatag og mga kagamitan sa mga nanagtungha sa tunghaang publiko isip bahin sa iyang tinguha nga madasig gayud ang tanan sa pagpadayon sa ilang pagtungha aron nga makalampos alang sa ilang maayong ugma. (BANATNEWS)