Dalaga giluba SA kanhi uyab

CEBU, Philippines - Samdan ang usa ka dalaga sa dughan human kini dunggaba sa kanhi niyang uyab dihang nasakpan siya nga nakigkuyog sa bag-o niyang hinigugma didto sa Tamia, barangay Basak, dakbayan sa Lapulapu   sa miaging kaadlawon.

Ang biktima mao si Jesabel Oyao, 21, nga taga barangay Maribago sa maong  dakbayan, samtang ang suspek nailhan usab nga si John Ryan Hernandez, 28, ulitawo nga   taga sitio Kadulang, barangay Agus sa mao gihapong dakbayan.

Si PO2 Franklin Bolaquia sa homicide section sa kapolisan sa maong dakbayan nga nahinabi sa Banat News miingon nga gikan pa sa iyang trabahoan ang biktima   ug nagpaingon na kining mopauli sa ilang balay uban sa bag-o niyang uyab nga si Vaniel Gomez.

Matud pa ni PO2 Bolaquia nga nag-atang na daan ang suspetsado sa parkingan sa mga traysikol sa maong lugar ug dihang nakita niini ang biktima uban ni Gomez, girumbo sa m maong suspek ang bag-ong uyab ni Oyao ug gihansakan sa iyang kutislyo.

Apan gumikan kay praktisado si Gomez, dali kaayo kining nakalihay busa wala masabak sa kutsilyong gihansak kaniya. Ang biktima kinsa nakakita nga giatake sa iyang karaang uyab ang bag-o niyang hinigugma kalit kining mipataliwa aron dili madunggaban   si Gomez.

Apan nakapasilaob kini sa kalagot sa suspetsado hiinungdan nga walay kukaluoy nga gihansakan sa iyang kutsilyo ang dughan sa biktima diin mitaop ang hinagiban

Samtang gihatod ang biktima ngadto sa Mactan Doctors Hospital, nasikop usab sa kapolisan ang suspetsado ug nagkagulkol na kini karon sa ilang prisohan.(WC) (BANATNEWS)