Mga armas ni Liu gikawat

CEBU, Philippines - Mitumaw sa imbestigasyon sa kapolisan nga gisulod sa wala mailhing tawo o mga tawo ug gipatay ang 2001 drug expose whistle blower nga si Bernard Liu kansang patay’ng lawas nadiskubrehan niadto nang Septiyembre 29 sulod sa iyang balay sa Naya subdivision, sitio Rattan, barangay Tanke, dakbayan sa Talisay.

Apan gawas sa maong hitabo, nasudlan na og kawatan ang balay sa biktima niadtong bulan sa Hunyo sumala pa sa imbestigador nga si SPO4 Daniel Tarucan sa Talisay City Police Station.

Ang mga imbestigador gitahasan sa pagsubay sa tanang anggulo lakip na ang mga kaniadto mga insidenteng may kalambigitan si Liu gawas sa pagkahimo niining whistleblower.

Si Tarucan uban nila ni PO3 Ferdinand Pablo ug PO3 Benedicto Lasque maoy gitahasan sa pag-imbestigar kabahin sa kamatayon ni Liu. Si Tarucan nga nahinabi sa Banat News kagahapon nagkanayon nga duna silay nadawat nga report nga niadtong buwan sa Hunyo misumbong sa barangay si Liu nga gikawatan kini sa iyang .9mm pistol ug kalibre .45 nga mga pistola.

Ang maong insidente usa karon sa gisubay sa mga imbestigador sa ilang gipahigayong follow-up nga imbestigasyon.

Lakip sa gisubay sa kapolisan ang insidente kaniadto diin si Liu nadunggaban ug nasulod sa Intensive Care Unit (CU) sa tambalanan.

Gisubay usab ang report nga si Liu dunay mga nakabangi kaniadto tungod sa dili maayong kinaiya niini ug gireklamo diha sa barangay.

Sa padayong imbestigasyon sa kapolisan sa kamatayon ni Liu, nabantayan sa mga polis nga nangaabli na ang mga drawers o kahon diha sa sala sa main house ug nangakay-ag ang mga butang diha sa duha ka kwarto ni Liu.

Matud usab ni Tarucan nga sama sa dunay gipangita ang nangutingkay diha sa mga drawer ug sa duha ka kwarto.

Gawas niini ang kapolisan dunay napalgan nga usa ka parisan sa surgical gloves diha sa lababo sa main house ni Liu.

Duol sa nahimutangan sa patay’ng lawas ni Liu dunay napalgan ang mga polis nga mga bildong buak sa botilya.

Sa pagkakaron nagpaabot pa gihapon ang kapolisan sa anak ni Liu nga makigkita kanila sa pamasin nga makakuha og dugang impormasyon o ba kaha lead sa kaso.

Kahinumduman nga si Chief Inspector Joe Martin Fuentes sa PNP Crime Laboratory nagkanayon nga dunay foul play ang kamatayon ni Liu kini subay sa resulta sa autopsy sa patay’ng lawas sa biktima.

Matud ni Fuentes nga dunay luta sa ulo ni Liu nga sama sa gibunalan og gahi nga butang ug dunay luta usab ang liog nga sama sa gituok. (BANATNEWS)