Call center agent mikiha sa amo

CEBU, Philippines - Kasong sibil ang gipasaka sa usa ka call center agent batok sa iyang gitrabahoang kompanya, security agency ug security guard kinsa nakapaangol kaniya human mobuto ang armas niini sulod sa trabahoan sa kihante.

Si Joseph Raymond Carmona, mipasaka og kasong grossly negligent acts batok sa Convergys Philippines, sa Soliman Security Agency ug sa gwardiyang si Jerry Tindugan.

Misang-at og kaso si Carmona tungod kay ang mga hingtungdan nagdumili sa pagpanubag sa ilang obligasyon kaniya kansang walang bitiis natusak sa bala   sa armas de fuego ni Tindugan.

Sa reklamong gisang-at ni Carmona mibutyag kini nga diha siya sulod sa Convergys nga nahimutang sa Banawa Hills niadtong Nobyembre 18, 2007, dihang kalit lang mibuto ang armas de fuego ni Tindugan ug mipuntariya ang bala nga may 73 ka mga tipaka ang mitusak   sa iyang bitiis.

 Nasayran ni Carmona nga si Tindugan wala mahilistang akreditadong security guard sa Philippine National Police, samtang ang gitrabahoan usab niining Soliman Security Agency   utro usab nga   wala marehistro sa Firearms Explosives Security Service Agency and Guards Supervisory Section (FESSAGS).

Gibutyag usab ni Carmona nga ang Convergys nga iyang gitrabahoan napakyas sa paghatag og luwas nga lugar alang sa mga trabahante ug labaw sa tanan wala kini magtinarong paghatag kaniya sa suporta sa mga tambal nga iyang gikinahanglan human siya madisgrasya.

Gani mibutyag usab si Carmona nga ang tagdumala sa maong kompaniya wala mopahibawo sa mga otoridad bahin sa nahitabo kaniya nga nabuthan sa armas.

Sa kasong gisang-at ni Carmona iyang gihangyo ang korte nga mandoan ang mga hingtungdan nga mobayad kaniya og P3 milyones sa temperate ug moral damages, laing P 1 milyon nga exemplary damages ug P100 mil alang sa lawyers fee ug litigation expenses. (BANATNEWS)