Bag-ong gikasal nalumos

CEBU, Philippines - Usa ka lalaking bag-ohay pang gikasal ang nalumos human kini mo-dive sa falls sa barangay Campagga lungsod sa Barili pasado alas-12 sa udto kagahapon.

Ang nalumos nailhan nga si Adrian Delarita, 24, molupyo sa sitio Kalawisan , Opon syudad sa Lapu-lapu kinsa bag-ohay lang gikasal sa lumad nga taga barangay San Rafael sa nahisgutang lungsod.

Sa inisyal nga imbestigasyon sa kapolisan sa lungsod sa Barili nagselebrar ang duha ka pamilya ug nangaligo sa Mantayupan Falls nga nahimutang sa maong lugar.

Giingong mi-dive si Delarita gikan sa ibabaw apan wala na kini motunga og balik hinungdan nga nangayo sila og tabang sa kapolisan.

Human sa tulo ka oras nga pagpangita napalgan kini alas 3:45 sa ilawom sa maong falls ug gihulagway nga nasangit kini ug gituohang nalumos.

Sa pakighinabi sa Banat News ni SPO1 Job Saavedra mibutyag kini nga posibleng tungod sa kakusog sa lilo sa tubig maong nadala kini sa ilawom. (BANATNEWS)