Whistleblower gipatay gyud

CEBU, Philippines - Aduna gyuy foul play tungod sa mga timailhang gipatay kini ug dili natural nga kamatayon ang gidangatan sa whistleblower sa 2001 drug expose nga si Bernard Liu kansang patay’ng lawas nakit-ang nagsugod na og kadugta sa iyang balay diha sa dakbayan sa Talisay niadtong Huwebes.

Si Chief Joe Martin Fuentes medical legal officer sa PNP Crime Laboratory nga nahinabi sa mga tigbalita mibutyag nga dunay foul play ang kamatayon sa biktima subay sa resulta sa autopsy.

Matud ni Fuentes nga posibleng gituok ang biktima sanglit dunay luta sa liog niini ingon man laceration sa iyang agtang nga gituohang gibunalan og gahi nga butang.

Gidugang ni Fuentes nga dugta na ang kalawasan sa biktima lakip sa tuong nawong, tuong bukton ug tiyan niini.

Dunay lungag sa tiyan ni Liu, apan matud ni Fuentes dili niya matumbok kun dinunggaban ba kini gumikan kay unang madugta sa lawas sa tawo ang tiyan.

Gisalikway ni Fuentes ang pagdudang posibleng naghikog kini apan matud ni Fuentes posibling duna gyuy tawo o mga tawong mipatay sa biktima kay kun naghikog pa si Liu dili na siya mohapak pa sa iyang agtang og gahi nga butang.

Gibana-bana ni Fuentes nga sobra sa duha na ka semana ug dili usab moabot ug usa ka buwan nga namatay ang biktima.

Samtang wala pa usab maklaro kun asyete ba gyud ang nakit-an nila sa lawas niini sanglit sagad sa mga minatay aduna gyuy mogawas nga ‘dark colored fluid’ ug ilaha pa kini karong gikumpirmar.        

Ang officer-in charge sa Talisay City Police nga si Supt. Eddie Recamara nagkanayon nga ilahang susihon ang mga report nga nangawala ang mga alahas ug ubang butang ni Liu.

Matud ni Recamara nga sa ilang pasiunang imbestigasyon walay bisan usa sa mga nagpuyo diha sa duol o silingan ni Liu nga nakadungog og komosyon sa nangaging mga adlaw.

Si Sr. Supt. Patrocinio Comendador, hepe sa kapulisan sa probinsya sa Sugbu sa press conference kagahapon nagkanayon nga duna na silay lead sa kamatayon ni Liu.

Matud niya nga ilang gisubay karun ang motibo sa tulis nga binuhatan sa mga local boys diha sa dakbayan sa Talisay.

Nagkanayon si Comendador posibleng gisaka sa wala mailhing tawo ang balay ni Liu unya dunay gikuha nga butang apan nasakpan ug misukol ang biktima.

Gipasabot ni Comendador nga kun ilang i-focus ang ilang imbestigasyon sa kaso ni Liu niadtong tuig 2001 layo na kaayo ang posibilidad tungod kay taud-taod na ang maong kaso.

Hinuon apilon kini sa ilang subayon. (BANATNEWS)