Kapyot, jaywalking higpitan sa Mandaue

CEBU, Philippines - Higpit na nga gidili sa kagamhanan sa dakbayan sa Mandaue ang pagkapyot sa mga sakyanan nga pribado ug pasaheroan ug ingon man ang pataka og labang sa kadalanan.

Kini nunot sa giaprobahang ordinansa nga Numero 12-2011638 nga giaprobahan sa konseho sa dakbayan nga ang tumong mapanalipdan ang publiko sa mga aksidente.

Si Konsehal Elstone Dabon nga maoy chairman sa committee on transportation nga maoy nangamahan sa maong ordinansa miingon nga lakip sa mga kalapasan sa ordinansa nga gipatuman mao ang pagkapyot ug pagsakay sa tapaludo sa sakyanan sa pribado ug pasaheroan.

Samtang ang paglabang sa dalan(jaywalking) sa mga tawo nga naglakaw ubos sa maong ordinansa gitugot lamang sa mga dapit nga gibadlisan o pedestrian lanes o crossing lanes sa buhatan sa city engineers. Ang mga dalan nga wala niini gidili gyud ang paglabang-labang ug aron maimplimentar kini adunay idestinong mga traffic enforcers sa kadalanan aron maoy mogiya sa publiko.

Ang maong ordinansa adunay silot nga pagbayad og multa nga P100, alang sa unang kalapasan, P200 sa ikaduha ug P500 alang sa ikatulong kalapasan. (BANATNEWS)