CEBU, Philippines - Gibutyag ni Mayor Michael Rama kagahapon nga dili na mahinayon karong adlawa ang pagsira sa Inayawan Sanitary Landfill gumikan sa mga kakulian nga giatubang sa kagamhanan sa siyudad sa Sugbo partikular na sa pagdili sa Mandaue City sa pag-agi sa mga garbage trucks sa siyudad sa Sugbo nga moagi sa ilang dapit paingon sa dumping area sa Consolacion.
Gitun-an na karon sa buhatan sa mayor ang mga agianan nga mahimong agian nga dili moagi sa Mandaue.
Sumala pa ni Rama nga gibuhat na sa kagamhanan ang tanan aron matuman ang kamandoan sa Department of Environment of Natural Resources sa pagtak-op sa Inayawan Sanitary Landfill apan dili gyud malikayan nga dunay kalit-kalit nga kakulian.
Giklaro hinuon sa mayor nga wala siya motuo sa pagduda sa uban nga panimalos kini sa pagdili sa siyudad sa Sugbo nga makasulod sa downtown area ang mga PUJ nga nagbiyahean sa Mandaue. Misaysay si Rama nga wala siya maghuna-huna og dautan busa ipabilin gihapon niya ang pag-umol og solusyon sa maong problema.
Samtang padayon karon nga giawhag ni Rama ang publiko sa pagtuman sa “No Segregation, No Collection Policy” aron magpadayon ang kalimpiyo sa dakbayan. (BANATNEWS)