Run 2 Plant 4 Greening Phl ipahigayon karon

CEBU, Philippines - Ang Run 2 Plant 4 Greening Philippines nga gipasiugdahan sa Ramon Aboitiz Foundation Inc. (RAFI) gipahigayon na usab karong adlawa didto sa barangay Jaclupan sa dakbayan sa Talisay. Sugod sa alas 6:00 karong buntag, magtagbo ang tanang mga kawani sa kagamhanan, estudyante   ug uban pang sektor sa katilingban didto sa maong lugar aron duawon ang gipananom niining mga lubangon sa kahoy sa maong dapit niadtong Hunyo 25, 2011.

 Ang tanang misalmot sa “Run to Plant” niadtong Hunyo 25 maoy gilauman nga kauban gihapon sa   grupo nga magpanon ngadto sa Jaclupan aron hiusahan ang maong kalihokan. Ang mosalmot niining Run 2, modagan gikan sa entrance sa Vista Grande subdivision sa barangay Bulacao, Talisay paingon ngadto sa lima ka ektaryang reforestation site sa Jaclupan.

Inig-abot ngadto ang tanan magdungan usab kini sa paghinlo sa mga punoan sa mga lubangon nga gipananom nila niadtong Hunyo 25. Unya inighuman og hawan sa punoan, buboan dayon og abuno aron masiguro ang tambok nga pagtubo niini.

Sa samang higayon kun ang mga gitanom   nga namatay, pamunaan kini og bag-ong tanom aron nga masiguro nga ang mga gipanamnan nga luna may motubo gayud nga  mga kahoy sa umaabot nga mga adlaw. Niadtong Hunyo mikabat sa 12,500 ka mga   lubangon sa nagkalainlaing matang sa   kahoy   ang gipananom didto sa kabungtoran sa Jaclupan.

Niining higayona gipaabot nga ang mga opisyal ug kawani sa kagamhanan sa Talisay lakip na ang mga kawani sa mga ahensya sa nasudnong kagamhanan   gipaabot nga mosalmot   niini sa pagpanguna sa taga RAFI. (BANATNEWS)