2 nalubaan sa siyudad

CEBU, Philippines - Duha ka lalaki ang naangol sa duha ka insidente sa pagpanunggab sa dakbayan sa Sugbu niadtong milabay’ng adlaw.

Usa ka Junard Ortiz, 29, empleyado sa Inayawan Sanitary Landfill ang gidunggab niadtong Miyerkules diha sa White Road Dumpsite ug ang suspetsado mao si Carlo Baluran nga taga Arrow Campo Drive sa maong barangay.

Matud sa biktima nga nagduwa sila og sugal nga hantak uban sa suspek pasado alas-8 sa gabii ug dihang namatay ang antog nasuko ang suspek kinsa may dala nang daan og kutsilyo dayong dunggab kaniya sa dughan.

Si Ortiz daling gidala sa Cebu City Medical Center (CCMC) samtang ang suspek daling miikyas. 

Si PO2 Cristobal Geronimo sa Homicide Section mitug-an nga si Baluran giingong adis-adis sa maong lugar base sa gibutyag sa biktima. 

Sa laing hitabo sa pagpanunggab usa ka Jeffery Panusanan, 20, sa Junquera St. barangay Kalubihan ang gidunggab sa duha ka wala mailhing tawo.

Matud sa biktima nga naglakaw siya sa maong lugar uban sa iyang higala nga si Joel kalit siyang gidunggab sa usa sa duha ka mga lalaking iyang gikasugat sa walay igong hinungdan.

Si Panusanan nakaangkon og samad dinunggaban sa tiyan ug anaa karun sa CCMC.(EIM)