Dinunggabay 3 naangol

CEBU, Philippines - Tulo ang naangol sa dinunggabay sa mga nangahubog sa tuba nga ilang gi-inum sa sitio Lower Tawog barangay Valladolid siyudad sa Carcar kagahapon sa alas 12:30 sa sayong kaadlawon.

Ang biktima mao si Arnel Alesna, 40, taga Pitalo sa lungsod sa San Fernando samtang ang suspek mao si Timoteo Campaña Jr., nagpuyo sa Lower Tawog sa barangay Valladolid ug giingong bag-ohay pang nakagawas sa bilanggoan.

Samtang apil sa naangol mao si Trainy Campaña, 25, nga igsuon sa suspek. Matud ni PO2 Rosendo Benondo sa Carcar Police Station dihang nahinabi sa Banat News ang biktima kauban sa suspek nga pulos ra managparyente nag-inom og tuba sa pinuy-anan ni Virgilio Campaña.

Apan sa kalit lang nagkabingkil si Alesna ug si Trainy ug mao nalay nabantayan nga nag-ilogay na og kutsilyo ang duha hinungdan nga mitabang og uwang ang suspek ug ubang kauban.

Apan nasamad gyud sa kamot ug walang bukton ug bukobuko si Trainy ingon man ang suspek nga naigo sa bukobuko. Sa kasuko sa naulahi mipauli kini ug mibalik ug nangita na sa biktima. Ang biktima nga nakalakaw gisundan sa suspek ug dihang naabtan sa balay niini gidunggab kini sa tiyan. Ang tulo pulos gihatud sa Carcar District Hospital. Ang suspek nga si Timoteo gidakop human sa iyang pagpatambal ug gihikay ang pagpasaka ug kaso.(EIM) (BANATNEWS)