CEBU, Philippines - Gihulagway sa tigpamaba sa Task Force Ellah Joy Pique nga si Sr. Supt. Patrocinio Comendador nga mugna sa kampo ni Bela Ruby Santos, ang usa sa gipasanginlang suspetsado sa pagdagit ug pagpatay sa bata, nga intrigahon ang task force aron malawgaw ang ilang mga operasyon.
Si Comendador sa interbyu sa mga tigbalita kagahapon sa buntag mitataw nga labihan ganing paningkamot sa task force nga matumbok ang tinuoray nga responsable sa krimen unya ilaha lang sayangan ang ilang kahago.
Si Reynante Pique nga nahinabi sa Banat News kagahapon sa dihang miadto kini sa provincial headquarters nagkanayon nga miadto siya sa buhatan sa iyang abogado nga si Atty. Joan Saniel sa Children’s Legal Bureau (CLB) sa dihang iyang nabasahan ang usa ka migawas nga makapabalakang report sa usa ka lokal nga mantalaan kagahapon.
Ang maong balita giingong daw nagtumbok na kaniya nga namasangil sa task force nga gikutlo usab gikan sa usa ka interbyu kaniya niadtong miaging adlaw nga migawas sad sa usa ka lokal nga telebisyon.
Matud pa ni Reynante nga buot niyang klaruhon kang Comendador ang migawas nga report sa pamantalaan nga wala siya moluwat og susama’g gipasabot nga pamahayag.
Sumala pa niya nga ang iyang gipadayag gibase ra niya sa mga nadunggang tabi-tabi diha sa dakbayan sa Naga nga giingong dunay usa ka sakop sa CIDG-7 nga sakop usab sa task force ang mitraydor.
Sumala pa sa maong report nga adunay sakop sa CIDG nga mi-text kang Santos kinsa didto sa Bohol kabahin sa operasyon batok kaniya. Giingong naembargohan og cellphone ang maong polis ug diha nasakpang kakunsabo kini ni Santos .
Subay sa nadunggang mga tabi-tabi ni Reynante nga nagdawatan og P20 mil matag buwan ang maong pulis gikan kang Santos. Sa iyang bahin si Sr. Supt. Jose Pante, hepe sa CIDG-7 nga gikuhaan og pamahayag sa mga tigbalita mihimakak sa maong report nga dunay iyang sakop nga mitraydor sa task force.
Matud ni Pante nga usa lang usab kini ka intriga apan wala siya motumbok kun ang kampo ba ni Santos maoy nagpakatap niining maong report.
Giklaro ni Pante dili siya mohimo og imbestigasyon sa iyang sakop tungod kay walay igong ebidensya ang maong taho.
Matud niya nga nagpadayon ang ilang manhunt operation kang Santos ug gani miabot na ngadto sa lain-laing mga lugar ang pagpangita kaniya.
Ang Ombudsman for the Visayas assistant deputy ombudsman nga si Virginia Palanca-Santiago miingon nga posibleng mapasakaan og kasong bribery ug obstruction of justice ang atubangon sa maong polis kung mapamatud-ang sad-an. (BANATNEWS)