Star witness namatay

CEBU, Philippines - Mihimo karon og lawom nga imbestigasyon ang kapolisan sa dakbayan sa Talisay kalabot sa kamatayon sa star witness sa usa ka high-profile drug case kansang patay’ng lawas napalgan ug padung nang madugta kagahapon sa buntag diha sa iyang balay sa Naya subdivision sa sitio Rattan, barangay Tanke.

Kahinumduman nga si Bernard Liu, 50, ang mitestigo ngadto sa House Committee on Dangerous Drugs niadtong tuig 2001 batok sa iyang kanhing amo nga mao ang magsuong negosyanteng sila si Peter Go Lim ug sa igsuon niining si Willington.

Ang mga opisyal sa barangay, tanod ug kapolisan ang mipugos og sulod sa balay ni Liu diin nadiskubrehan ang patay’ng lawas niini.

Si Supt. Eddie Recamara, officer-in-charge sa Talisay City Police Station nagkanayon ngadto sa mga tigbalita nga si Liu posibleng tulo ka adlaw nang patay.

Matud niya nga mopahigayon pa sila og follow-up nga imbestigasyon sa hinungdan sa kamatayon ni Liu.

Ang mga sakop sa Scene of the Crime Operatives (SOCO) kinsa mitabang kagahapon sa kapolisan sa Talisay sa imbestigasyon sa insidente wala usab mohatag og pamahayag kung natural lang ba ang kamatayon ni Liu o gipatay ba kini.

Nasuta sa kapolisan nga dunay pisi nga nakit-an diha sa kilid sa patay’ng lawas ni Liu.

Si Junnie Padillo, 24, kanhi katabang ni Liu kinsa usa sa unang nakakita sa patay’ng lawas mibutyag nga dunay baga nga pisi nga gilibod sa liog ni Liu.

Si Liu napalgan nga nagbuy-od diha sa sawog sa iyang balay diin ang baba niini nagbuka nga gituohan nga misinggit kini.

Si Bernie Labajo, kanhi katabang usab ni Liu ug nagpuyo diha lang sa duol ang unang gitawag sa ilang mga silingan dihang nakatimaho sila og baho gikan sa balay si Liu.

Matud ni Labajo nga nakabantay usab siya nga daw adunay samad sa tiyan ni Liu ug daw giligo kini og asyete. Gikataho nga dunay sundang nga napalgan diha sa kama ni Liu apan walay nakitang dugo sa maong sundang.

Nahibulong ang mga silingan ni Liu tungod kay duha ka semana na kining wala makitang mogawas sa iyang balay nga matag buntag ug hapon mogawas man gyud kini aron mopalit sa iyang pagkaon.

Nasuta pud sa mga imbestigador ang main door sa balay ni Liu gi-padlock ug dunay iron bar nga gibabag nga nakapahibulong nila.

Si Liu nag-inusarang nagpuyo sa maong balay human nga ang iyang kapuyo mibiya kaniya lakip na ang ilang bugtong anak.

Si Liu ug Ananias Dy maoy mibarog nga whistleblowers batok sa mga Lim. Ang mga alegasyon kusganong gihimakak sa magsuong Lim atol sa maong inquiry.

Samtang si Ananias Dy, 50, gipusil patay sa duha ka nagmotorsiklong lalaki diha sa eskina sa dalan Salvador ug Katipunan niadtong Hulyo 2006. (BANATNEWS)