CEBU, Philippines - Mi-plead not guilty ang usa ka estudyante sa nursing sa kasong parricide nga gisang-at batok kaniya atol sa arraignment niini sa Regional Trial Court Branch 18 kagahapon.
Si Christian Lucky Dalangin, 25, miatubang kang Judge Gilbert Moises nga maoy mipahigayon sa pagpaminaw sa habig sa suspetsado.
Samtang gilauman usab kagahapong adlawa nga mapatuman ang manifesto nga gisang-at sa habig ni Dalangin pinaagi sa iyang amahan nga si Virgilio kinsa maoy mitanyag sa usa ka plea bargaining agreement.
Nasayran nga ang plea bargaining agreement gitumong aron unta mapaubsan ang sentensya sa pagkapriso ni Dalangin ngadto sa walo ka tuig nga pagka-bilanggo.
Kini tungod kay ang kaso nga gisang-at sa kapolisan batok ni Dalangin nga parricide silotanan sa pagkabilanggo sulod sa 20 hangtod 40 ka tuig ug gusto sa amahan sa suspetsado nga mapakubsan ang maong sentensya.
Gani tungod sa plea bargaining agreement nga gitanyag sa amahan ni Dalangin ang arraignment niadtong Lunes gisibog kagahapon kay gihatagan ni Judge Moises ang pamilya sa biktima og higayon nga makadesider kini kun dawaton ba nila o dili ang gitanyag sa amahan ni Dalangin.
Apan kagahapong adlawa wala mahinayon ang maong plea bargaining agreement kay misupak ang pamilya sa biktima. Kahinumdoman nga niadtong Agosto 23, giingong gigulgol ni Dalangin ang ubol-ubol sa iyang inahan nga si Ruby Rosa Tenchavez, 53, ug sa pagkamatay niini didto niya ilubong sulod sa ilang bodega.
Usa sa hinungdan sa maong krimen mao ang kasuko sa suspetsado nga wala siya hatagi og kuwarta sa iyang inahan.
Niadtong Agosto 26, 2011 naugkat ang patay’ng lawas ni Tenchavez diin giangkon usab kini ni Dalangin nga siya maoy mihimo sa maong krimen. - BANAT NEWS