CEBU, Philippines - Gitakdang makigtagbo si Mayor Michael Rama sa grupo sa mga environmentalist nga nagpasiugda sa road revolution program ning dakbayan aron tun-an ang tukmang karsada nga gamiton alang sa sunod nga hugna sa maong kalihokan sa sunod buwan.
Aminado si Rama nga nakadawat siya og reklamo gikan sa mga tawo nga naapektohan sa road revolution sa miaging semana busa angayan nga tun-an kini pag-ayo aron makahimo ang syudad og tukmang higayon sa pagpangandam sa maong kalihokan. Matud pa sa mayor nga dili siya mamasol ni kinsa man busa mohimo na lang siya og lakang aron dili mausab ang kahasol nga nasinatian sa mga tawo sa miaging semana.
Kahinumdoman nga nangayo na og dispensa sa publiko ang mga nagpasiugda sa road revolution sa miaging semana gumikan sa kahasol niini nga gihatag ngadto sa publiko, apan mipasalig sila nga mohimo og taas nga pagpangandam aron dili na mausab pa sa sunod nilang pagpatuman sa maong programa karong Nobyembre. - BANAT NEWS