Batan-on patay sa kulata

CEBU, Philippines - Dili sagpa ang namatyan sa usa ka bayong-bayong kundi kulata sumala sa doktor nga nag-awtopsiya sa lawas niini kagahapon.

Si Dr. Nestor Sator, ang medico legal officer sa PNP Crime Laboratory nga maoy nag-awtopsiya sa lawas patay ni John Rey Manlisic, 16, taga barangay Montaneza, sa lungsod sa Malabuyoc, nagkanayon nga nasuta niya nga ang namatyan sa biktima mao ang hemorrhage.

Buot ipasabot nga maayong pagkabun-og ug pagka-kago sa utok sa biktima nga misangpot sa iyang kamatayon.

Gitino ni Sator nga sa paghiling niya sa lawas sa biktima grabi ang mga   bun-og sa tiyan ug ulo niini.

“Dili gyud sagpa ang namatyan sa biktima kay nakita nako ang grabing pagkabun-og sa ulo nga miapektar sa iyang utok”, sumala ni Sator ngadto sa mga tigbalita.

Gibutyag sa uyoan sa biktima ngadto kang Sator nga una mamatay ang biktima nagsuka-suka kini human kulataha sa iyang  ama-ama nga si Renato delos Reyes, 44.

Gipasabot ni Sator nga kun magsuka-suka, dako kaayo og kadaot ang utok niini, busa delikado kaayo ang maong kahimtang, matud pa niya.

Gitug-anan usab si   Sator sa ig-agaw sa biktima nga matag sayop niini sagpaon kini sa iyang ama-ama kay mao kuno kini matang sa disiplina niya sa iyang mga anak.

Hinuon matud pa ni Sator nga nagtuo siya nga walay intensiyon ang suspetsado sa pagpatay sa iyang humabdos apan malagmit  nahinaykan lang gumikan sa iyang kalagot.

Si Manlisic namatay   tulo ka oras human kini madala ngadto sa MJ Cuenco District Hospital sa Malabuyoc niadtong Lunes. Ang suspetsado kinsa nagtingkagol na karon sa prisohan   sa Malabuyoc Police Station miangkon nga gisagpa niya ug gibunalan og palwa sa saging ang biktima gumikan sa iyang kapungot dihang ang kuwarta niining igpapalit og bugas giingong gikawat sa biktima kay giduwa og computer games.

Apan si Sator wala makatuo nga sagpa lang ang nahiagoman sa biktima kay ang resulta sa awtopsiya nagpakita nga ang utok niini maoy apektado.

Samtang si Sr. Insp. Amadeo Pepito, hepe sa Malabuyoc Police Station mibutyag nga napasakaan na nila og kasong kriminal si delos Reyes kagahapon sa Provincial Prosecutor’s Office sa dakbayan sa Sugbo.  - BANAT NEWS