'Bukas kotse' mibiktima'g 2 Amerkano

CEBU, Philippines - Midangop sa kapolisan ang laing magtiayon nga American national human usab mabiktima sa pagpanglungkab sa mga sakop sa ‘bukas kotse’ gang ang ilang Pajero nga gi-parking sa dalan A.S. Fortuna sa barangay Banilad, dakbayan sa Mandaue alas-2 pasado ang takna sa miaging hapon ug gisakiyo ang ilang mga butang.

Ang biktima mao sila si John Hallman, 69, ug Imelda Hallman, 65, kasamtangang nagpuyo sa barangay Talamban, dakbayan sa Sugbo.

Si PO3 Sanche Fegarido sa Investigation Detection and Management Bureau (IDMB) sa Mandaue City Police Office (MCPO) nagkanayon nga kadiyot lang nilang gibilin ang sakyanan sa maong dapit apan sa ilang pagbalik buak na ang walang bahin nga windshield niini.

Sa ilang pagsusi wala na ang blue bag nga nagkantidad og $50, digital camera nga nagkantidad og $200 ug mga importanteng dokumento sama sa ilang passport, US drivers license, Philippine drivers license ug mga ATM card sa bangko nilang magtiayon.

Dugang pa nga gitug-an sa magtiayon nga ang mga estambay sa maong dapit mitug-an kanila nga gitaparan sa pag-parking sa pula nga multicab ang ilang sakyanan ug mipahilayo usab kini sa maong lugar dihang nakamatikod ang mga nagdala nga lalaki nga nagpaingon na sila sa ilang sakyanan.

Sa nasayran sa Banat News nga unang midangop sa buhatan sa kapolisan ang usa ka American national sa Santo Niño Village sa barangay Banilad, dakbayan sa Mandaue human gilungkab ang panimalay niini.

Si PO1 Cristito Raboy sa Investigation Detection and Management Bureau (IDMB) miila sa biktima mao si Jeffrey Robert Newman, 32 anyos, minyo nga nagpuyo sa maong dapit. Matud pa ni Raboy nga gikan nga nanglakaw ang biktima kuyog sa iyang pamilya sa dakbayan sa Sugbo ug natingala na lamang kini sa ilang pagpauli naguba na ang pultahan.

Nawagtang na ang ilang DVD player, lap top, projector camera, bed sheet ug uban pa.  - BANAT NEWS