Water Refilling Stations pahigpitan

CEBU, Philippines - Giawhag ni 6th District Board Member Thadeo Ouano ang Department of Health (DOH) 7 sa pagpasiugda og education and training seminar sa mga nagdumala og water refilling station sa lalawigan sa Sugbo.

Si Board Member Ouano nga maoy chairman sa committee on environment sa hunta probinsiyal sa iyang gipangamahanan nga resolusyon mipasabot sa kamahinungdanon sa maong kalihokan sanglit gitumong man kini sa paghatag og kasiguroan sa panglawas sa katawhan.

Dugang pa niya nga gikinahanglan kaayo sa buhatan sa DOH ang pagsuta daan sa mga water refilling stations nga mapatuman ang mga rekisito nga gipatuman dinhi sa lalawigan. Gitataw niya nga kinahanglang limpiyong tubig mainom ug luwas ang katawhan paglikay sa mga sakit sama sa nahitabo sa Danao, lungsod sa Moalboal ug Alegria nga gikataho nga adunay biktima sa diarrhea ug typhoid fever nga giingon nga ang tubig nga ilang giinom ang hinungdan.

Gipahinumdom ni Ouano ang nasinati sa dakbayan sa Danao niadtong Diseyembre tuig 2010 nga mokabat sa 263 ka mga tawo ang nabiktima sa diarrhea outbreak ug typhoid fever.  - BANAT NEWS