Langyaw motabang pagsulbad sa trapiko

CEBU, Philippines - Gihangop sa mga mayor sa mga lugar nga nahisakop sa Metro Cebu Development Coordinating Board ang gitanyag nga tabang sa IBM Philippines bahin sa pagtuon sa mga problema sa matag lungsod ug syudad sa natad sa traffic management ug Land Used.

Nangulo sa tigum sa mga mayor nga sakop sa MCDCB mao si Governor Gwendolyn Garcia ug pipila ka labaw nga opisyal sa IBM.

Sigun pa ni Mayor Adelino Sitoy sa lungsod sa Cordova nga dako kaayo og ikatabang ang pagtuon sa IBM sa ilang lungsod sa pagsulbad sa suliran bahin sa trapiko   nga kumon kaayo sa Metro Cebu Area.

Kini tungod kay dili na man sila mogasto og dakong pundo alang sa pagpahigayon sa pagtuon aron masulbad ang mga problema sa Metro Cebu nga gawas sa trapiko, anaa pay baha ug uban pa.

Si Gobernador Garcia miingon nga bulontaryong mitanyag sa ilang tabang ang IBM Philippines ngadto sa mga sakop sa MCDCB nga iyang gipangulohan kay matud pa tipik ug kabahin kini sa ilang corporate social responsibility.

Matud pa sa gobernadora nga ang mga opisyal sa IBM Philippines mitumbok nga ang maong serbisyo   maoy bahin sa ilang kasaulogan sa ika -100 ka tuig sa pagkatukod sa ilang korporasyon.

Sa maong lakang nga pagtabang, gitakdang mobisita dinhi sa Sugbo ang 6 ka mga dagkong opisyal   sa IBM nga gikan pa sa Italy, Sweden,   Germany ug USA aron makigkita ug makighinabi sa mga mayor nga sakop sa MCDCB.  - BANAT NEWS