Motor nasaghira'g bus tulo naangol

CEBU, Philippines - Tulo ang angol human masaghiri ang motorsiklo nga ilang gisakyan sa usa ka autobus didto sa national highway sa barangay Catmon Daan sa lungsod sa Catmon, kagahapon sa alas 6:50 sa buntag.

Ang mga biktima mao sila si Lolita Botaya, 50, magtutudlo sa Catmon National High School, iyang mga anak nga si Ethel Botaya, ug Ryan Botaya, nga pulos taga Catmon.

Samtang ang drayber sa Autobus mao si Casemiro Longakit, 61, nga taga Bliss sa barangay Labangon ning siyudad sa Sugbo.

Sa pasiunang imbestigasyon sa kapolisan nasayran nga nagpahatud sa motorsiklo ang mga biktima ngadto sa ilang tunghaan diin magtudlo ang inahan ug ang anak niini si Ethel dihang pag-abot sa nahitaboan kalit lang mi-overtake si Longakit   sa motorsiklo nga ilang gisakyan

Apan wa kaayo makontrolar sa drayber sa Autobus ang iyang sakyanan busa nasaghiran niini ang manobela sa motorsiklo.

Nalamba ang motorsiklo sa sementadong karsada ug ang inahang Botaya nabunal ang ulo sa karsada , si Ethel nabagnos ang nawong sa karsada ug si Ryan samdan sa ulo.

Ang mga biktima daling gihatod ngadto sa Juan Dosado Memorial District hospital sa silingang lungsod sa Sogod.

Apan si Ryan gikatahong nagsuka sulod sa maong tambalanan hinungdan ang doctor nga miatiman kanila mirekomendar sa pagpadala sa tulo ka biktima   sa pribadong tambalanan dinhi sa dakbayan sa Sugbo.

Si SPO3 Asis Boto, traffic investigator sa Catmon Police Station nagkanayon nga sala gyud sa drayber sa Autobus kay wala kini makabantay sa motorsiklo nga gisakyan sa tulo ka mga biktima.

Si Longakit nga na-interview sa TV5 News mitug-an nga atol sa iyang pag-overtake sa motorsiklo nga gisakyan sa tulo ka mga biktima, may gikasugat siyang laing sakyanan hinungdan nga iyaha kining gibawi apan naigo hinuon ang motorsiklo nga gisakyan sa mga biktima. Sa pagkakaron gitanggong sa kapolisan si Longakit samtang gipaabot niini ang kiha nga isang-at batok kaniya.  - BANAT NEWS