500 hektarya tamnan sa CEDC-TPC Kabilin Project

CEBU, Philippines - Aron pag-uli sa nahatag nga kaayuhan sa kinaiyahan ug komunidad ang duha ka mga power companies dinhi sa Sugbu inabagan sa mga molupyo, pribadong sektor ug sa Department of Environment and Natural Resources Forestry Department milusad og reforestration project sa bukirang barangay sa dakbayan sa Sugbu.

Ang Cebu Energy Development Corporation, Toledo Power Corporation inabagan sa Cebu Uniting for Sustainable Water Foundation (CUSW) mananom sa 500 ektaryang luna gikan sa mga barangay sa Central Cebu Protected Landscape.

Ang mga barangay nga tamnan og mga kahoy mao ang mga barangay sa Cantipla, Sudlon, Taptap ug Pung-ol-Sibugay diin wala na gamita sa mga molupyo isip umahan.

Ang maong mga dapit maoy gikunsiderar nga headwater area sa Mananga Watershed.

“We (CEDC) don’t want to be there from the start, but we want to be there at all times,” matud pang Arthur Aguilar, ang presidente sa CEDC kabahin sa ilang corporate social responsibility program nga Kabilin.

Ang Kabilin aduna nay pet project sa Malubog Watershed sa barangay Climaco, Toledo City nga diin 100 ka hektarya ang gitamnan og mga lumad nga kahoy ug mga kahoy nga adunay prutas.

Sa gihimong ceremonial tree planting kagahapon nga gihimo sa Gov. Joe Leyson Peak gisugdan ang Kabilin Mananga Forest Restoration Project nga gitambungan sa mga opisyales sa DENR, Cebu City Hall , CUSW ug sa simbahan.

Si DENR-7 Forestry Department director Isabelo Montejo nagkanayon nga walay ikabilin ang henerasyon karon ngadto sa mosunod kondili ang maayong kinaiyahan.

“Wala kitay laing ikabilin sa next generation kondili a good environment. We will be remembered positively,” matud pa ni Montejo.

Apan si Montejo miingon nga usa sa labing dakong problema kaniadto sa mga proyektong susama niini mao ang ‘sustainability’ kon paglahutay tungod kay ang mga residente sa duol maoy apektado maong ini og kaguwang sa mga kahoy ilang pamutlon ug ibaligya sama sa sugnod, uling ug uban pa.

Sa programa sa Kabilin, ang mga residente hatagan og dakong papel aron maoy moorganisa, moplano ug mobantay sa mga kahoy. Sa habig sa CEDC, tudloan sila og hustong mga teknik sa panguma aron mas dako ang ilang abot ug aron dili nila pamutlon ang mga kahoy sa Kabilin.  (BANAT)