Trak ug multicab nagsungag 12 naangol

CEBU, Philippines - Naangol ang 12 ka tawo dihang ang multicab nga pasaheroan kalit nasungag sa gikasugat nga Fuso canter nga sakyanan sa dalan A.C Cortes Avenue sa barangay Cambaro, dakbayan sa Mandaue alas 2 pasado ang takna sa miaging kaadlawon.

Si PO1 Jeffrey Alpas sa traffic division sa Mandaue City Police Office (MCPO) nga nahinabi sa Banat News miila sa drayber nga nagmaneho sa multicab nga pasaheroan nga mao si Romel Aala Sulit, 33, nga taga barangay Buaya, dakbayan sa Lapulapu kinsa naapil sa mga naangol.

Ang mga biktima kansang mga pangalan wala pa makuha atol ning pagsulat sa balita gidala sa Mandaue City Hospital. Giila usab ni Alpas ang drayber sa trak de karga nga mao si Virgilio Aying Lopez, 41, taga sitio Soong sa barangay Mactan sa maong dakbayan.

Ang maong multicab gikan sa Lapulapu nga may pasahero apan pag-abot sa maong dapit nakasungag niini ang maong gikasugat nga trak.

Ang duha ka sakyanan maayong pagkaguba samtang nangapakong ang mga pasahero sa sulod sa multicab.

Si Solidad Capin nga maoy nurse on duty sa Mandaue City Hospital nga nahinabi sa Banat News miingon nga sagad sa mga biktima gagmay lang nga kadaot ang nahiaguman. (Romeo T. Limpangog/EIM) (BANAT)