16-anyos napatay sa papa

CEBU, Philippines - Aksidenteng napatay sa kulata sa usa ka 44-anyos nga mananggiti ang 16-anyos nga anak nga mikuha sa ilang igpapalit og bugas ug gihurot og duwa og kompyuter.

Nahitabo kini niadtong Lunes sa buntag sa usa sa mga barangay sa lungsod sa Malabuyoc apan ang bata diha na nakabsi sa kinabuhi sa tambalanan. Ang bata human gikatahong nabunalan og saha sa saging ug gilaparo sa 44-anyos nga amahan human nawala ang kwartang igpapalit og bugas niadtong Lunes sa buntag.

Sumala pa sa kapolisan, ang biktima naglisod na sa pagginhawa dihang daling gidala sa amahan ngadto sa tambalanan sa M.J Cuenco Memorial District Hospital apan human sa dul-an sa tulo ka oras nga pagtabang sa mga doktor nakabsan kini sa kinabuhi.

Si PO1 Bella Donna Ybañez, imbestigador sa Women’s and Children’s Protection Desk sa Malabuyoc Police Station nagkanayon nga ang biktima gikulata og maayo sa amahan tungod sa kasuko niini.

Matud ni Ybañez nga miangkon ang bata nga iyang gikuha ang kuwartang gitagoan sa amahan ug iyang giduwa sa internet computer games hinungdan nga nasuko og maayo ang amahan.

Tungod sa kakusog sa paghapos nabungkag ang saha sa saging maong wala na kini mausbi og hapos apan gisagpa nalang kini sa amahan ug nakuyapan.

Matud ni Ybañez ang biktima maoy kamagulangang anak sa pito ka managsuon ug gikatakda untang mo-gradwar sa high school sa sunod tuig sa usa ka pampublikong tunghaan nga nahimutang ra usab sa maong barangay.

Gidugang niini nga ang amahan labihan gyung sukoa sa dihang nahibaw-an niini nga nawala ang iyang kuwarta ug wala na silay ikapalit og bugas alang sa ilang pamahaw.

 “Nagmahay tuod siya pero wala na man siya’y mahimo kay patay na man,” matud pang Ybañez sa dihang nahinabi sa The Freeman igsuong pamantalaan sa Banat News kagahapon.

Matud sa amahan ngadto sa kapulisan nga ang iyang anak (biktima) kapila na manguha sa ilang kwarta ug makadaghan na nila kining gipahimangnoan apan wala sila paminawa.

Si Sr. Insp. Amadeo Pepito, hepe sa Malabuyoc Police Station mi-request sa PNP Crime Laboratory-7 aron ipa-autopsy ang patay’ng lawas sa bata pagtino kung unsay namatyan sa biktima.

 “Posible lang dunay sakit unya wa lang sila kahibawo unya na-trigger atong pagsagpa sa amahan,” matud pang Pepito. (Ug Ria Mae Booc The Freeman/EIM) (BANAT)