PNA-7 supak sa memo vs volunteer nurses

CEBU, Philippines - Gisupak ang Philippine Nurses Association-7 ang gipadala nga memo ni Health Secretary Enrique Ona kalabot sa mga hospital nga gidumala sa Department of Health nga nagmandong pahunongon na ang tanang volunteer nurses.

Matud pa ni Ariel Pabelonia, PNA treasurer nga nagplano sila karun nga mohimo og position paper nga nagkanayon nga padayunon gihapon ang mga volunteer nurses apan dili na kini pabayron.

Midugang si Pabelonia nga ila karun nga pangusgan nga ang mga volunteer nurses mahatagan man lang og bisan transportation allowance ug certificate nga sila nakatrabaho.

Butyag usab ni Pabelonia nga ila karun nga gi-discourage ang mga nurses nga mobayad sa mga tambalanan aron lang makaangkon og certificate nga sila usa ka volunteer.

Giawhag usab ni Dr. Ronald Fermo, PNA Vice President Programs and Development Governor nanghinaot nga suportahan sa mga local government units ang mga volunteer nurses tungod kay sila maoy mga frontliners sa katilingban batok sa mga sakit.

Sa laing bahin, ang PNA-7 mopahigayon og community service ug social responsibility activities isip kabahin sa kasaulogan sa ilang ika-89 nga founding anniversary, 54th Nurses Week ug Annual Convention.

Ang PNA-7 mopahigayon og fun run karung umaabot Oktubre 22, diin ang dagan molangkob sa 3k, 6k ug 12k. Ang registration fee sa maong dagan nagkantidad og P350 samtang ang rehistrante nga mauna pagparehistro makabayad lang og P250.

Matud pa sa event organizer nga si Dr. Jay Jabonero nga ang maong fun run usa ka fund raising nga ilang idonar ngadto sa Philippine Red Cross gani ilang giawhag ang publiko sa pagtambong sa maong         kalihukan.

Lakip usab sa ilang kalihukan mao ang local ug international Jobs Fair nga ipahigayon sa Ayala Mall Activity Center diin tanang professionals sa rehiyon 7 makaambit sa maong kalihukan.

Samtang gipasabot ni Fermo nga 15 na ka tuig ang nakalabay ug karun pa nahibalik ang convention sa mga nurses dinhi sa Sugbu. (Lesley Caminade-Vestil/EIM) (BANAT)