CEBU, Philippines - Nakigtagbo si Gov. Gwendolyn Garcia sa tanang barangay kapitan sa lungsod sa Minglanilla ug sa grupo sa kabatan-onan nga giingong maoy responsable kaniadto sa pipila ka mga bandalismo sa maong lungsod apan karun namugna na isip usa ka grupo nga mobantay batok sa paghugaw-hugaw.
Atol sa ilang panagtagbo, si Garcia mihangyo ngadto sa 32 ka batan-ong mga grupo nga mo-recruit pa og laing kabatan-onan aron tabangan ang kampanya batok sa Anti-Graffiti kon bandalismo.
Gani gipaninguha sa gobernadora nga malimpyo na gyud ang kabungbongan nga gipangbandalan diha sa lungsod sa Minglanilla.
Matud pa sa gobernadora nga mga “soldiers against graffiti” na ang 32 ka batan-ong nagkatapok aron pangusgan ang pagpanglimpyo sa mga nagkatag nga bandalismo sa lungsod sa Minglanilla.
Si ABC-President Manolo Delgado, kapitan usab sa barangay Tungkil nagkanayon nga namugna ang grupo sa kabatan-onan niadto pang buwan sa Abril ug dako ang ilang kalipay nga nakigtambayayong gyud kini kanila.
Midugang si Delgado nga ang napulo ka barangay nga anaa daplin sa highway mahimutang mao karun ang ilang giuna sa pagpanglimpyo nga nagkahugaw tungod sa bandalismo.
Apan human sa napulo ka barangay ila usab dayun nga isunod ang nahibilin nga siyam ka barangay.
Nasayran nga ang lungsod sa Minglanilla maoy giuna tungod sa naghitak nga mga bandalismo sa maong lungsod nga hugaw tan-awon.
Gani nasayran usab nga ang pamaagi sa mga kabatan-onan mao nga padaghanay ug padak-anay og letra nga ilang mabandal hinungdan nga hugaw nang tan-awon ang pipila ka mga dapit sa maong lungsod.
Karung umaabot Oktubre 18 gikatakdang bisitahon sa gobernadora ang maong lungsod aron himamaton usab ang ubang kabatan-onan nga andam nga masakop sa kampanya sa anti-graffiti sa maong lungsod. (EIM) (BANAT)