CEBU, Philippines - Mokabat sa P2 milyones ang kantidad sa mga alahas ug salaping dolyar nga nasakiyo sa wala pa hiilhing mga kawatan gikan sa usa ka balay sa Pacific Grandvilla Subdivision sa barangay Suba-Basbas, dakbayan sa Lapulapu nga gilungkab sa miaging gabii.
Si Inspector Juan Capacio, hepe sa kapolisan sa Presinto 4 sa barangay Marigondon sa Lapulapu City Police Office miila sa mga biktima nga sila si Emmanuel Mapalote, 34 ug Jowey Mapalote, 31 nga nagpuyo sa maong balay.
Matud pa ni Inspector Capacio nga giguba sa mga kawatan ang door knob sa pultahan sa balay ug dihang nakasulod na gipanguha ang ilang mga butang nga naglakip sa mga imported nga perfume, laptop, digital camera, mga imported nga sapatos, nagkadaiyang matang sa mga alahas nga nagkantidad og kapin sa P1 milyon ug ang pitaka nga adunay sulod nga $1,500 nga salapi.
Si Inspector Capacio miingon nga pagpanglungkab giatol samtang diha sa pagkahinanok sa pagkatulog ang mga biktima sa mga lapas alas 12:00 sa tungang gabii.
Nakurat na lamang ang mga biktima dihang sa ilang pagmata maoy ilang namatikdan nga nagkatag na ang mga butang sa sulod sa ilang panimalay nga maoy hinungdan sa ilang pagtaho niini ngadto sa kapolisan. (Romeo T. Limpangog/WC) (BANAT)