CEBU, Philippines - Usa ka kanhi asset sa polis nasikop sa gipahigayong buy-bust operation sa Provincial Intelligence Branch (PIB) niadtong Sabado sa hapon didto sa barangay Bungtod ug Gairan, dakbayan sa Bogo.
Ang nahisgutang asset mao si Carlito Bondesto Jr. alyas “Junior Boang” kinsa naimbargohan og unom ka gagmay’ng pakete, usa ka medium nga pakete ug usa ka dakung pakete nga shabu nga mokabat tanan og P40 mil, P500 nga buy-bust money ug ID sa Barangay Intelligence Network (BIN).
Lakip nga nasikop mao sila si Ronnie Alvarez Nonong, Rex David Nonong Lepsana ug Elisser Comahig Aballe.
Si PO3 Reynaldo Solante, team leader sa maong operasyon mibutyag nga nakadawat og report ang ilang buhatan kabahin sa pagnegosyo ni Bondesto sa ginadiling drugas hinungdan nga ila kining gipanid-an ug ilang nasuta nga positibo ang ilang nadawat nga impormasyon.
Ang kapolisan ug ang kagawad sa barangay nga si Jocelyn de la Cruz kinsa asawa sa usa ka polis nga nadestino sa Bogo Police Station mibutyag nga si Bondesto level two nga drug pusher sa Bungtod.
Si PO2 Gerry de la Cruz, bana sa nahisgutang kagawad mibutyag nga si Bondesto dili mamati sa ilang mga tambag ug gani dili kini niya tagdon kung moadto sa ilang balay.
Si Solante mibutyag nga duna usab silay nadawat nga report nga usa ka anak nga babaye ni Bondesto nasikop sa kapolisan sa pier area sa Bogo sa paghupot niini og shabu ug dihang mobiyahe na unta kini ngadto sa probinsiya sa Masbate.
Si Bondesto temporaryong nagtingkagol sa Liloan Police Station detention cell ug mag-atubang og kasong kalapasan sa Akta Republika 9165 kon “Comprehensive Dangerous Drugs Act Law” nga ipasaka sa kapolisan sa Regional Trial Court (RTC) sa Bogo.
Sa laing operasyon sa kapolisan sa maong adlaw ang suspetsadong nailhan lang sa ngalan nga “Jason” nakaikyas apan ang tulo ka mga kauban niini maoy nasikop sa mga polis sulod sa balay ni Alvin Ruiz.
Naimbargo sa mga polis gikan sa maong mga suspetsado ang walo ka paketeng shabu, duha ka putos nga pinaugang dahon sa marijuana, upat ka linikit nga marijuana, usa ka kalibre .38 nga revolver nga dunay upat ka mga bala, usa ka Suzuki Raider nga motorsiklo nga nagtangag sa plakang 1215-IP, usa ka pocket size nga notebook ug mga drug paraphernalia.
Si Solante mibutyag nga si Jason kinsa maoy subject sa ilang operasyon daling nakasibat kay nakabantay kini sa ilang pag-abot.
Si Solante midugang nga kalapasan sa Section 11, 12 ug 15 sa Akta Republika 9165 maoy ipasaka nilang kaso batok sa lima ka mga suspetsado.
Ang nahisgutang tulo ka nadakpan naa usab karon gidetiner sa karsel sa Liloan Police Station. (Brenda D. Batuto ug Ria Mae Y. Booc sa The Freeman/WC) (BANAT)