Dunggan nabuslot

CEBU, Philippines - Nabuslot sa bala ang dunggan sa usa ka tawo human pusila sa security guard niyang silingan nga nakigsinumbagay sa ilang barkada didto sa sitio New Paradise, barangay Pajo, dakbayan sa Lapulapu sa miaging gabii.

Ang biktima mao si Albert Minguito, 32, minyo, nga taga Pajo, samtang ang suspetsado mao si Anaclito Antipuesto Anuada, 26, usa ka security guard   nga nagbantay sa usa ka beach resort sa barangay Agus sa maong dakbayan ug silingan sa biktima.

Si PO2 Winston Ybañez sa homicide section sa kapolisan sa maong dakbayan nga nahinabi sa Banat News miingon nga sa wala pa ang maong pagpamusil gikainom sa biktima ang suspetsado kauban sa lain nilang higala nga nailhan lang nga usa ka Ryan.

Samtang nag-inom silang tulo, kalit lang nagkalalis si Anuada ug si Ryan nga misangpot sa pagsinumbagay sa duha.

Ang biktima kinsa   nahingawa sa   away sa duha, kalit nga miuwang sa maong sinumbagay.

Apan matud pa siya’y gipahimungtan sa suspetsado   kinsa mipauli sa ilang balay sa maong higayon.

Apan taud-taod mibalik kini nga nagbitbit na sa iyang armas de fuego ug nangita kang Ryan nga iyang kasinumbagay.

Samtang naglibot-libot siya og pangita kang Ryan, nasigpatan niini ang biktima nga   nagpaingon   na sa ilang balay ug mao kini ang iyang gipusil.

Apan tungod kay nakabantay na ang biktima    nga siyay puntariya sa suspetsado, pagbuto gyud sa armas sa sikyu, abtik kaayo siyang mihupo.

Hinungdan nga imbis bagul-bagol niya maoy mabuslot, ang iyang dunggan maoy naigo sa bala ug maayong pagkalungag. Ang biktima nga gisukit sa mga kapolisan mitug-an nga ulo gyud niya maoy gipunting sa suspetsado apan giangkon niya nga nasuwertihan lang siya nga nadunggan lang sa pagkaigo.

Gihatod dayon ang biktima ngadto sa tambalanan, samtang gipangita pa sa kapolisan ang suspetsado kinsa nakasibat human maigo niya ang biktima.

Mibahad ang biktima nga iyang pasakaan og kiha ang suspetsado. (WC) (BANAT)