Dughan gitaroya'g gunting

CEBU, Philippines - Maayong pagkataroy sa gunting diha sa dughan sa usa ka 42-anyos nga lalaki human kini dunggaba sa iyang kapuyo tungod sa selos kagahapon sa kaadlawon diha sa sitio Paglaom, barangay Bulacao, dakbayan sa Talisay.

Ang biktima mao si Esterlito Bacla-an, residente sa maong dapit kinsa daling gidala ngadto sa Talisay City District Hospital tungod sa samad dinunggaban sa ubos nga bahin sa iyang tuong dughan.

Apan tungod sa iyang kahimtang gibalhin ngadto sa Vicente Sotto Memorial Medical Center.

Ang suspetsado mao si Jelyn Horado, 42, residente usab sa maong dapit kinsa daling misibat human sa hitabo ug padayon pang gipangita sa mga polis.

Base sa imbestigasyon nila ni SPO1 Mikie Espina ug PO2 Stephen Sefuesca nga sa wala pa mahitabo ang insidente niadtong Sabado si Bacla-an ug Horado nag-atubangay kini diha sa barangay hall sa Bulacao.

Si Bacla-an mipasangil nga nagpunay og selos kaniya si Horado ug gipasanginlan siya niini nga dunay laing karelasyon.

Si Bacla-an gitambagan sa taga barangay nga molikay lang una samtang init pa ang ulo ni Horado aron dili modaku ang ilang away.

Sa maong tambag si Bacla-an nianang pagkagabii diha matulog sa balay sa iyang higala nga ilaha ra usab nga silingan apan diha lamang sa gawas.

Samtang natulog si Bacla-an nakamata kini nga dunay nagtaroy sa iyang dughan ug sa iyang pagtan-aw nakita niya ang kapuyo nga mihansak sa gunting diha kaniya.

Giibot ni Bacla-an ang gunting gikan sa iyang dughan ug nahitabo ang ilang inilogay nila ni Horado.

Si Bacla-an nakahigayon pa og dagan paingon ngadto sa barangay hall ug nakapangayo og panabang samtang daling miikyas ang suspek. (BANAT NEWS)