Minero gibulit og pinusilan
CEBU, Philippines - Naglunang sa kaugalingong dugo nga napalgan ang usa ka minero pasado alas-12 sa tungang gabii kagahapon sa sitio Katambisan barangay Mantalongon lungsod sa Dalaguete.
Ang biktima nailhan nga si Rene Indomo, 19, usa ka minero ug lumad nga molupyo sa Payasan, Negros Oriental ug kasamtangang nagpuyo sa sitio Grand China sa nahisgutang barangay.
Sa imbestigasyon sa kapolisan nasayran nga ang biktima nakit-an nalang nga nagbuy-od ug nagkadugo nga wala nay kinabuhi sa usa ka Ritchelieu Betcher sa diha sa maong lugar.
Sa pakighinabi sa Banat News ni SPO2 Clito Pia, imbestigador sa Dalaguete Police Station mibutyag kini nga matud pa sa igsuon sa biktima nga si Faustino nga sa wala pa mahitabo ang maong insidente nag-disco ang biktima sa maong barangay ug nagkig-inom.
Matud pa ni Pia nga naabot sa Mantalongon Dalaguete ang biktima uban sa iyang igsuon tulo na ka semana tungod sa trabaho niini isip minero.
Napanglantawan ni Pia nga posibleng adunay gikaaway ang biktima sa diskohan nga maoy hinungdan nga gipusil kini apan ila pa usab kini nga susihon.
Nakuha sa crime scene mao ang tulo ka kabhang sa kalibre .45, duha ka slugs niini ug usa ka buhing bala sa susama gihapon nga kalibre. (BANAT NEWS)
- Latest
- Trending
