US sayon rang sudlon

CEBU, Philippines - Gipasalig ni US Ambassador to the Philippines Harry Thomas Jr. nga sayop na ang pagtuo sa uban nga ang mga Pinoy lisod nga makapuyo didto sa Estados Unidos.

Matud pa ni Thomas nga dili tinuod ang tsismis nga lisudlisoron ang mga Pinoy nga buot mobisita o motrabaho didto sa US.

Kini tungod kay sigun sa iyang nakuhang record, may kapin na sa 4 ka milyon ka mga Pinoy ang nagtrabaho ug nagpuyo na didto sa US karon.

Iya usab nga gitug-an nga ang maong gidaghanon sa mga Pinoy nga mipuyo sa US pulos mga dokumentado ug dili TNT kon Tago ng Tago.

Hinuon gipahibawo niini nga ang pagkuha sa gikinahanglang mga papeles alang sa pagkuha og visa paingon sa US padayon ug hugot nga gipatuman.

Dugang pa ni Thomas nga maong panginahanglan karon sa mobiyahe ngadto sa US maoy usa sa pagpakita sa hugot nga suporta sa kagamhanan sa nasud sa   kampanya batok sa human trafficking nga gipasiugdahan ni Governor Gwendolyn Garcia. (BANAT NEWS)