Baquero napili pag-usab

CEBU, Philippines - Ang bag-ong napiling presidente sa Cebu Federation of Beat Journalist (CFBJ) nga si Elias Baquero sa Sun Star Daily nanghinaot nga ipadayon ang suporta sa grupo sa bag-ong napiling mga opisyal sa kapunongan.

Si Baquero kinsa ika-unom na kahigayong napili nga presidente sa organisasyon naglaom nga labing molig-on ang grupo sa pagpakigbisog   aron labi pang mapalambo ang organisasyon sa katibuk-an.

Apan alang kaniya nga ang kalamboan sa pundok mag-agad sa kakugi ug mauswagong kahibawo sa mga sakop niini sa pag-atiman sa tagsa-tagsa ka natad sa panuwat og balita nga gitahas kanila sa ilang mga amo.

Nunot niini si Baquero mapasalamaton sa dakung pagsalig nga gihatag kaniya sa organisasyon sulod na sa pipila ka katuigan diin siya ang gipiyalan nga manguna sa kapunongan.

Ang mga bag-ong napiling opisyal sa CFBJ mao si Bise Presidente Oscar Pineda sa Sun Star Daily, Secretary, Liv Campo sa The Freeman, Treasurer, Joseph Elvir Tubilan sa Sun Star Superbalita, Auditor, Flor Perolina sa The Freeman, Board of Directors, Gregg Rubio sa The Freeman, Ryan Mark Borinaga sa The Freeman/ Banat News, Rene Borromeo sa The Freeman, Norman Mendoza sa DYSS, Chito Aragon sa Cebu Daily News ug DYLA, Alex Badayos sa Sun Star Daily, Irene Seno-Cruz sa Cebu Daily News ug Gabby Malagar sa The Freeman/Banat News.

Usa sa nasubhang gimbuhaton sa kapunongan mao ang pagpahigayon og hinabang sa usa sa mga membro niini nga nasugamak sa disgrasya sa sakyanan.

Kini pinaagi sa paghatag og P5,000 nga cash assistance   kang Norman Mendoza nga usa sa mga sakop sa kapunongan kinsa nakasinati og disgrasya sa karsada sa milabay’ng mga semana. (BANAT NEWS)