Hiniusang panglimpyo sa eskuylahan gihimo

CEBU, Philippines -  Gihimo sa mga magtutudlo ang hiniusang pagpanglimpiyo sa palibot sa Mayor Alejandro A. Fortuna Memorial Elementary School sa barangay Guizo sa dakbayan sa Mandaue sa miaging buntag sa pagpanguna sa school principal nga si Maria Divina Flores.

Ang  girumbo sa ilang panglimpyo mao ang mga   kanal sa pagsiguro   aron nga libre ang pagbuhagay   sa tubig paingon sa kadagatan.

Samtang si Wendy Bejo nga maoy presidente sa Parents Teacher Association (PTA) mao usab ang nangulo sa mga ginikanan nga miabag sa mga magtutudlo ug tinun-an   sa maong gimbuhaton.

Si Flores mibutyag sa Banat News nga ang ilang pagpanglimpiyo sa matag Sabado maoy naandan na nga gihimo sa mga opisyal   sa barangay nga gipangulohan ni Kapitan Arnulfo Capacite apan magbalhinbalhin kini sa lain-laing nga mga sitio sa barangay Guizo.

Dugang pa ni Flores nga samtang sa habig nilang mga magtutudllo ug mga tinun-an, naanad na sila sa matag adlaw nga Biyernes nga maoy ilang ipanghinlo sa palibot sa eskuylahan.

Kini aron   nga dili na masubli ang lunop sa tubig sa uwan sama sa   ilang nasinati niadtong Enero 25 niining tuiga nga nakapahunong   sa ilang klase tungod sa paglunop sa tubig sa nahisgotang dapit.

Ang tulunghaan sa Guizo anaa mahimutang   sa luna nga gipanag-iya sa kagamhanan   ug natukod kini sa panahon ni kanhi Mayor Alfredo Ouano niadtong tuig 1994. Matud pa ni Flores nga nagplano ang kagamhanan sa dakbayan   nga papahawaon ang mga molupyo   nga anaa sa daplin sa kanal magtukod og balay  tungod kay sila’y makapabara sa tubig sa panahong mobundak ang uwan. (BANAT NEWS)