Bayot mikatkat sa tower kay maghikog

CEBU, Philippines - Tungod sa away sa manag-uyab, usa ka mahuyang mikatkat   sa tumoy sa usa ka cellular tower kay buot moambak ug magpakamatay didto sa barangay Coro, lungsod sa Dalaguete kagahapon sa alas 7:00 pasado sa buntag.

Ang buot untang maghikog giila sa kapolisan nga si Emmanuel Payusan Amancio, 29, gikatahong usa ka bayot ug molupyo sa maong lugar

Si SPO2 Veronico Santino, sa Dalaguete Police Station mibutyag sa Banat News nga sayo kaayong nautingkay ang katawhan sa maong lugar dihang si Amancio nagpatong na sa tower sa Sun Cellular ug andam nang molayat paingon sa ubos.

Matud pa ni Santino nga sa dihang gi-alarma na si Amancio, ang kapolisan nga gipangulohan sa ilang hepe, kauban sa mga bombero sa maong lungsod nagtinabangay aron ma-rescue ang mahuyang.

 Midugang si Santino nga pag-abot nila sa maong lugar giingong mi-aksyon na unta pag-ambak si Amancio apan maayo nalang kay napugngan kini sa kapolisan hinungdan nga wala siya makalayat sa tower nga may gitas-ong 150 ka tiil.

Nasayran ni Santino gikan ni Leoncio Payusan, ig-agaw ni Amancio nga nagka-away   ang naulahi ug ang uyab niining bayong-bayong nga nagtungha sa 4th year high school.

Kini tungod kuno kay nakauyab usab og babaye ang uyab ni Amancio hinungdan nga buot nalang kining magpakamatay puslan man.

Kagahapon sa udto gipaubos sa stress briefing si Amancio aron mauli-an sa iyang kaguol busa wala na kini magtingog-tingog ug wala na usab mokaon. (BANAT NEWS)