Ulo napikas sud sa mixer

CEBU, Philippines - Namatay diha-diha ang usa ka helper human mapikas ang ulo niini sa dihang miandar ang mixer sa semento   nga iyang gilimpyohan   sa usa ka konstruksyon nga gitrabahoan  niini sa barangay Subangdaku, dakbayan sa Mandaue sa miaging kaadlawon.

Ang biktima mao si Elpedio Balonggas Bediagan, 58, minyo ug nagtrabaho isip batching plant helper sa Kimwa Construction and Development Corporation nga nahimutang sa Subangdaku.

Si PO1 Roldan Balimbing sa homicide section sa kapolisan sa Mandaue City Police Office (MCPO) nga nahinabi sa Banat News miingon nga sa ilang pakisusi nga gihimo ilang nasayran nga misulod ang biktima sa mixer sa semento kay nanglimpiyo niini.

Apan kalit nga miabot si Octavio Carteciano de Luna, 46, minyo, nga taga sitio Pinahagbong sa barangay Subangdaku sa maong dakbayan nga maoy batching plant operator ug mideretso og paandar sa mixer.

Segun sa kapolisan, si de Luna mitug-an kanila nga wala kini masayud nga didto ang biktima sulod sa mixer niadtong higayona.

Unya mao nalay iyang   namatikdan nga samtang nag-andar ang mixer may   nagkagulkol   sa ilawom niini samtang nagtuyok,   busa dali niyang gipawong.

Dayon iya kining   gipasil-ing sa laing helper nga si Edgar Bediangan, 24, nga anak sa biktima ug nakurat nalang kini dihang nakita niya nga ang iyang amahan maoy didto sa ilawom sa mixer nga wala na maglihok.

Misugat sa iyang panan-aw   ang nanuasik nga dugo sulod sa mixer gikan sa ulo sa iyang amahan nga maayong pagkapikas.

Si De Luna nga gisukitsukit sa mga imbestigador sa Investigatioin Detection and Management Bureau (IDMB) mialigar nga wala kini magtuo nga didto sa sulod sa nahisgotang mixer ang biktima tungod kay dili man usab kadto oras sa ilang pagpanglimpiyo.

Si PO1 Balimbing miingon nga si De Luna nga mitahan ngadto kanila ila dayong gibalhog sa detention cell sa Presinto 2 sa Subangdaku Police Station ug ilang pasakaan og kaso nga reckless imprudence resulting to homicide. (WC)(BANAT NEWS)