33 PUJs nga way basurahan gipamulta

CEBU, Philippines - Nunot sa gihingusgang kampanya batok sa pagpataka og labay og basura 32 ka mga jeepney drivers ang giisyuhan og tiket ug gipamulta tungod kay wala silay basurahan sa sulod sa ilang sakyanan.

Ang mga sakop sa Mandaue City Solid Waste Management ug sa Barangay Ibabao Estancia Joint Enforcement Team mipahigayon og kinalit nga inspeksyon sa mga sakyanang pasaheroan agi og pagpatuman sa City Ordinance 96-022.

Matud pa ni Ibabao Estancia barangay kapitan Carmelino del Mar ang maong operasyon maoy pagsanong sa kampanya batok sa pagpataka og labay sa basura sa ilang barangay.

Base sa Ordinansa sa dakbayan sa Mandaue No. 96-022 nga naglatid sa pagdakop ug pagsilot niadtong mga publikong sakyanan nga dili mobutang og basurahan sud sa ilang sakyanan.

Ang malapason niini makamulta og P500 ingon man sa pagpasaka og kaso batok sa makalapas niini ug ang korte mosilot pinaagi sa pagpamulta gikan sa usa ka libo ngadto na sa 5 ka libo ka pesos.

Matud pa ni del Mar ang pagbutang og basurahan sulod sa sakyanan makadisiplina sa mga pasahero nga dili magpataka’g labay sa ilang mga basura sa kadalanan.

Gumikan niini ilang pahingusgan ang kampanya sa maong ordinansa ug mohimo usab sila og lakang sa pag-edukar sa katawhan kalabot niini.

Matud pa ni Placido Jerusalem ang hepe sa Solid Waste Enforcement Office seryoso sila sa maong kampanya sa Ordinansa 95-022 ug gani lakip ang 50 ka mga kompaniya nga nakalapas sa law of segregation ila usab nga gipamulta. (EIM) (BANATNEWS)